Foto: Ilustrim
Kërkohet paraburgim për shoferin tek aksidenti me tre të vdekur
Sot, Prokuroria e Gjakovës, ka bërë kërkesë për caktimin e masës së paraburgimit kundër të pandehurit D.H.
Rasti ka të bëjë me aksidentin që ndodhi në Rahovec më 26 korrik.
Sipas prokurorisë, i pandehuri D.H., ka rrezikuar trafikun publik gjatë drejtimit të automjetit të markës “Renault Laguna” pasi ka shkaktuar aksident në komunikacion, duke dalur në drejtimin e kundërt të rrugës dhe duke goditur automjetin e markës” VW Golf II”.
Si pasojë e këtij aksidenti kanë ndërruar jetë tre persona. Dy persona kanë ndërruar jetë në vendin e ngjarjes, dhe një tjetër pasi ka arritur në Spitalin Rajonal të Gjakovës,
Kallxo.com kishte raportuar për këtë aksident me fatalitet.
Javën e kaluar ditën e premte, në aksidentin në Bërnjak të Rahovecit fillimisht kishin vdekur dy persona dhe katër persona tjerë kishin pësuar lëndime trupore, e pastaj është konfirmuar edhe vdekja e personit të tretë.
Viktimat e këtij aksidenti kishin qenë dy burra dhe një grua.
Në lidhje me këtë rast, komuna e Rahovecit, në krye me kryetarin Smajl Latifi, ditën e hënë e kishte shpallur ditë zie për qytetarët e kësaj komune.
Pas aksidenteve të shumta në një kohë të shkurtër, edhe Policia kishte bërë thirrje për kujdes në komunikacion.
Policia e Kosovës, përmes sms-ka apeluar tek qytetarët që të kenë kujdes në trafik dhe të respektojnë rregullat e komunikacionit.