I ofroi 10 euro zyrtarit policor, dënohet me 6 muaj burgim

Gjykata e Prizrenit e ka dënuar me  200 euro gjobë dhe me 6 muaj burgim të akuzuarin Shpëtim Jonuzi për shkak se u gjet fajtor për dhënie ryshfeti.

I akuzuari Shpëtim Jonuzi, në shqyrtimin fillestar gjatë ditës së sotme e ka pranuar fajësinë për veprën të cilën e ngarkoi Prokuroria.

Me pëlqimin e të akuzuarit dënimin me burgim Gjykata ia zëvendësoi me dënimin me gjobë në shumën prej 600 euro.

Në këtë dënim, të akuzuarit gjithashtu do t’i llogaritet koha e kaluar në paraburgim.

Sipas Prokurorisë me 5 korrik 2021, në pikën kufitare në Vërmicë, i akuzuari në mënyrë të drejtpërdrejtë i kishte ofruar dhuratë të paarsyeshme personit zyrtar që ky i fundit  të mos veprojë në pajtim me detyrën zyrtare.

Tutje akuza e Prokurorisë thotë se  derisa ishin duke udhëtuar nga Republika e Shqipërisë për në Kosovë për mes autobusit, me ç’rast zyrtari policor  verifikon ndalesën hyrëse të bashkëshortes së të akuzuarit, i pandehuri Shpëtim Jonuzi në atë moment nxjerr nga xhepi kartëmonedhën 10 euro dhe ia ofron policit kufitar i cili e njofton mbikëqyrësin e tij dhe ndalohet në Polici.

Me këtë Shpëtim Jonuzi sipas Prokurorisë u akuzua se ka kryer veprën penale dhënia e ryshfetit.