I akuzuari nuk deklarohet pa avokat, sërish dështon seanca për keqpërdorim dhe mashtrim në prokurim publik

I akuzuar për veprën penale keqpërdorimi dhe mashtrimi në prokurimin publik, Mifail Vogliqi ka dalur para gjykatësit në Gjilan për t`u përballur me akuzën e Prokurorisë por seanca ndaj tij dështoj të mbahet pasi i akuzuari nuk u deklarua pa mbrojtës.

“Është e rëndë të mbrohem personalisht për veprën penale që më ngarkohet, i propozoj gjykatës që seanca e sotme të shtyhet për një ditë tjetër, në mënyrë që të kem mundësi ta angazhojë një avokat për të më mbrojtur në këtë çështje penale”, tha i akuzuari Vogliqi, propozimin e të cilit e pranoj gjykatësi Aziz Shaqiri.

Seanca e sotme u ndërpre për të vazhduar më 22 korrik 2021.

Kujtojmë se edhe seanca e caktuar për datën 14 korrik në këtë rast kishte dështuar të mbahet pasi Gjykata nuk kishte mundur të ja siguroj adresen për dërgimin e fteses për seancë.

Mefail Vogliqi akuzohet se në cilësinë e pronarit të operatorit ekonomik “Gerlica Company”-ShPK, me seli në fshatin Babush të Ferizajt, me vetëdije ka shkelur rregullat e Ligjit për Prokurimin Publik me qëllim të mashtrimit në procedurat e prokurimit publik dhe ndikimit tek autoritetet kontraktuese.

Sipas aktakuzës, ai ka paraqitur dokumentacion të rremë, përkatësisht pa autorizimin e Arben Kastratit inxhinier i komunikacionit dhe Agim Durgutit inxhinier i ndërtimtarisë, të cilët kompania e tij nuk ka pasur kurrfarë parakontrate apo kontratë të punës, por që i akuzuari i ka përdorur të dhënat e tyre personale, përkatësisht dokumentet mbi përgaditjet e tyre profesionale si diplomat dhe të tjera, për të plotësuar kriterin e dosjes së tenderit të shpallur nga Komuna e Vitisë më 1 tetor 2020, lidhur me projektin “ndërtimi i rrugës Viti-Kërbliq-Kaqanik, faza e dytë”.