Foto: Kallxo.com
Gjykimi për drogë në Gjakovë: Mungon prokurori, të akuzuarit pa avokatë
Në rastin gjyqësor në të cilin Veton Bakija po akuzohet për posedim të drogës, ndërsa Faton Osmanaj për blerje e shitje të drogës, nuk u kundërshtua aktakuza.
Të hënën, në gjykatën e Gjakovës ishte planifikuar të kundërshtohej aktakuza, por dy të akuzuarit nuk kishin angazhuar avokat.
Në seancë poashtu mungonte edhe prokurori i këtij rasti Ali Uka, i cili kishte njoftuar gjykatën që është i zënë me një seancë tjetër në Pejë.
Ndërsa gjyqtari Shaqir Zika, caktoi datën 22 gusht për mbajtjen e shqyrtimit gjyqësor.
KALLXO.com muajin e kaluar kishte raportuar për këtë rast.
Në seancën e kaluar, Veton Bakija ishte deklaruar i fajshëm, ndërsa Faton Osmanaj nuk e kishte pranuar fajësinë dhe kishte thënë se është duke u shëruar për varësinë qe ka ndaj narkotikëve.
Sipas aktakuzës, Faton Osmanaj në shkurt të këtij viti në afërsi të shkollës “Yll Morina” në Gjakovë, ishte zënë nga zyrtarët policorë duke i dorëzuar Veton Bakijes 0.46 gramë “heroinë”, në vlerë prej 10 euro.
Ndërsa gjatë bastisjes, policia i kishte gjetur Veton Bakijës në xhepin e djathtë të pantallonave sasi e njëjtë e heroinës të cilën, siç thuhet në aktakuzë, e kishte blerë nga Faton Osmanaj.
