Foto: KALLXO.com
Gjykimi i policëve, shikohen CD-të me pamjet nga pika kufitare
Në gjykimin për keqpërdorim të detyrës zyrtare ndaj dy zyrtarëve policorë, Ismet Deva dhe Bit Shala, Gjykata e Gjakovës i njoftoi sot palët se kishte pranuar një shkresë nga Dogana e Kosovës.
Sipas kësaj shkrese, vlera e sendeve të padoganuara thuhet se është 150 euro, ndërsa Prokuroria në aktakuzën e saj thotë se vlera e dëmit që i ishte shkaktuar shtetit të Kosovës arrin shumën 564.60 euro.
Pra, sipas Doganës së Kosovës, rezulton se dëmi i shkaktuar ndaj shtetit të Kosovës është më i vogël se dëmi i përcaktuar në aktakuzën e Prokurorisë.
Dy zyrtarët policorë, Ismet Deva dhe Bit Shala, po akuzohen nga Prokuroria se kishin lejuar kalimin e dy veturave me mallra komerciale të dy personave, Bajram Gjoka dhe Muhamet Tahiri, pa regjistrimin e tyre, duke i shkaktuar buxhetit të Kosovës dëm në vlerën e sipërpërmendur.
Më pas, gjykimi vazhdoi me leximin e provave materiale, ku ndër to ishin edhe dy CD-të nga pika kufitare e Qafë-Prushit.
Në këtë pikë kufitare, Prokuroria pretendon se personat Bajram Gjoka dhe Muhamet Tahiri në orën 18:00 deri në ora 18:30, kanë qenë në pikën kufitare duke pritur që të kalojnë kufirin.
Mirëpo, në seancën e sotme gjatë shikimit të dy CD-ve nuk vëreheshin lëvizjet e këtyre personave.
Si rrjedhojë, prokurori Ali Uka propozoi që si dëshmitar të dëgjohet hetuesi nga Inspektorati Policor i Kosovës, Gëzim Nasufi, parashtruesi i kallëzimit penal.
Ndërsa Gjykata duke aprovuar propozimin e prokurorit caktoi datën 30 shtator për të dëgjuar dëshminë e parashtruesit të kallëzimit penal, për sqarimin e kohës së kalimit të dy personave.
Seanca e kaluar kishte dështuar si pasojë e mungesës së përfaqësuesit ligjor të Doganës së Kosovës.
Gjakovë: Policët akuzohen për 40 pako dredhëza
Në këtë rast është dëgjuar udhëheqësi i kalimit kufitar Qafë-Morinë, bashkë me dy dëshmitarë të tjerë, Bajram Gjoka dhe Muhamet Tahiri.
Dy zyrtarët policorë, Ismet Deva dhe Bit Shala, po akuzohen nga Prokuroria për veprën penale të keqpërdorimit të pozitës së tyre zyrtare, duke lejuar kalimin e mallrave pa regjistrimin e tyre.
Në muajin maj, policët kishin kundërshtuar aktakuzën e Prokurorisë duke kërkuar që të hidhet si e pabazuar.
Kallxo.com ka raportuar edhe më herët për këtë rast.
Ismet Deva dhe Bit Shala ishin deklaruar të pafajshëm në Gjykatën e Gjakovës.
https://kallxo.com/gjakove-policet-akuzohen-per-40-pako-dredheza/
Zyrtarët doganorë, Ismet Deva dhe Bit Shala, po akuzohen se në pikën kufitare Qafë-Prush, rreth orës 20:20, duke keqpërdorur detyrën e tyre zyrtare kanë lejuar hyrjen e mallrave komerciale, duke i shkaktuar dëm material Kosovës në vlerë 564.60 euro.
Prokuroria thotë se këto veprime kanë ndodhur në prill të vitit 2018.
Sipas aktakuzës, dy zyrtarët policorë kishin lejuar që dy veturat e personave Bajram Gjoka dhe Muhamet Tahiri, të ngarkuara me mallra komerciale të hynin në territorin e Kosovës, duke mos i regjistruar ato në sistemin SIMS.
Në aktakuzë thuhet se veturën e parë të ngarkuar me perime, fruta të ndryshme e fidane të vogla, e drejtonte Muhamet Tahiri, ndërsa veturën e dytë, e cila kishte 40 kuti me dredhëza, e drejtonte Bajram Gjoka.
Gjithnjë sipas aktakuzës, në atë kohë dhe në atë pikë kalimi kufitar nuk kishte oficerë doganorë si kompetentë për të vlerësuar dhe lejuar hyrjen e mallrave.
Mirëpo këto mallra janë lejuar që të hynin nga Republika e Shqipërisë në Republikën e Kosovës duke i shkaktuar shtetit të Kosovës dëm material në shumën prej 564.60 euro.