Arkiv - Gjykimi i Kolë Pukës | Foto: KALLXO.com
Apeli ia vërteton dënimin me burgim dhe gjobë ish-gjykatësit Kolë Puka
Gjykata e Apelit ka vendosur që ish-gjykatësit Kolë Puka të ia vërtetojë dënimin për kryerje të veprës penale të pastrimit të parave.
Gjykata e Prishtinës në shkurt të këtij viti kishte shpallë aktgjykimin ku gjykatësit i kishte shqiptuar dënim me burgim prej 1 viti si dhe gjobë në vlerë prej 3000 eurove për veprën penale të pastrimit të parave.
Ndërsa Gjykata e Apelit pas shqyrtimit të ankesave të pranuara nga ana e vetë të akuzuarit si dhe Prokurorisë Speciale, ka vendosur që ta aprovojë ankesën e ushtruar nga ish-gjykatësi.
Por ndonëse Gjykata e shkallës së dytë ia ka aprovuar ankesën ish-gjykatësit, të njëjtit nuk ia ka zbutur lartësinë e dënimit por vetëm ja ka ricilësuar veprën penale nga Ligji për Parandalimin e Pastrimit të Parave dhe Luftimit të Financimit të Terrorizmit në veprën penale të Pastrimit të Parave të rregullores së UNMIK-ut 2004/2.
“Me aprovimin e ankesës së akuzuarit Kolë Puka, e sipas detyrës zyrtare, ndryshohet aktgjykimi i Gjykatës Themelore-Departamenti për Krime të Rënda në Prishtinë, … datë 27.02.2019, përkitazi me ri cilësimin e veprës penale dhe vendimit mbi dënim, ashtu që i akuzuari Kolë Puka shpallet fajtorë për veprën penale Pastrimi i parave nga neni 10.02 i rregullores së UNMIK-ut 2004/2 dhe për këtë vepër penale ia merr si të vërtetuar dënimin me burgim në kohëzgjatje prej 1 viti dhe dënimin me gjobë në shumë prej 3000 eurove”, thuhet në aktgjykimin e Gjykatës së Apelit.
Tutje Gjykata e Apelit i ka marrë si të vërtetuara dënimet e veçanta të shqiptuara me aktgjykimin e formës së prerë të Gjykatës Supreme lidhur me veprat penale të nxjerrjes së kundërligjshme të vendimeve gjyqësore si dhe keqpërdorimit të pozitës apo autoritetit zyrtar.
“Po ashtu i merren si të vërtetuara dënimet e veçanta (të shqiptuara me aktgjykim të formës së prerë të Gjykatës Supreme të Kosovës ) për veprën penale nxjerrja e kundërligjshme e vendimeve gjyqësore nga neni 432 të KPRK-së, dënimi me burgim në kohëzgjatje prej 1 viti e 6 muaj dhe për veprën penale Keqpërdorimi i pozitës apo autoritetit zyrtarë nga neni 422 të KPRK-së, dënimi me burgim në kohëzgjatje prej 2 viteve ashtu që kjo gjykatë bazuar në nenin 80 të KPRK-së të akuzuarit i shqipton dënim unik me burgim në kohëzgjatje prej 3 vite e 6 muaj si dhe dënimin me gjobë në shumë prej 3000 eurove. Pjesa tjetër e aktgjykimit mbetet e pa prekur.”, thuhet më tej në këtë aktgjykim.
Ndaj këtij aktgjykimi të formës së prerë ish-gjykatësi Kolë Puka kishte parashtruar kërkesë për mbrojtje të ligjshmërisë në Gjykatën Supreme e cila ish-gjykatësit ja ka aprovuar pjesërisht kërkesën në atë mënyrë që ka marrë vendim për të anuluar pjesërisht aktgjykimin e Gjykatës Themelore të Prishtinës si dhe asaj të Apelit lidhur me veprën penale të pastrimit të parave duke e kthyer kështu çështjen në rivendosje për këtë vepër ndërsa për dy veprat e tjera penale, Gjykata Supreme e ka ndryshuar vetëm vendimin lidhur me dënim duke i marrë si të vërtetuara dënimet, për veprën penale të nxjerrjes së kundërligjshme të vendimeve gjyqësore dënimin prej 1 viti e 6 muaj si dhe për veprën penale të keqpërdorimit të pozitës apo autoritetit zyrtar dënimin prej 2 viteve, që në total ish-gjykatësit i ishte shqiptuar dënimin unik në kohëzgjatje prej 3 vjet e 4 muaj.