Gjykata vendos për ish-zyrtarët e komunës së Gjilanit
Inspektorët Merita Cana-Shabani, Shkëndije Mahmuti-Hajdini, Baki Azemi dhe ish-drejtori i Urbanizmit, Valon Shefkiu, për të tretën herë janë liruar nga akuzat.
Gjykata e Gjilanit përsëri edhe në këtë shqyrtim të tretë gjyqësor që ishte urdhëruar nga Gjykata e Apelit, nuk ka mundur të gjej fajtor të akuzuarit.
Kujtojmë se në seancën e fundit prokurori Arben Kadriu, pati kërkuar dënimin e të akuzuarve.
“Prokuroria qëndron pranë aktakuzës dhe konsideron që pas gjitha provave dhe shqyrtimeve do të vërtetohet se të akuzuarit i kanë kryer veprat penale që ua vënë në barrë aktakuza”, pati thënë prokurori Kadriu.
Gjithashtu përfaqësuesi i Komunës së Gjilanit pati deklaruar se i bashkëngjitet ndjekjes penale dhe do të kërkojnë kompensimin e dëmit.
Mbrojtësit e të akuzuarve patën kërkuar lirimin e të akuzuarve në mungesë të provave.
Sipas Prokurorisë katër të akuzuarit gjatë periudhës kohore 2013-2014, në Gjilan nuk kishin ndërmarrë veprime zyrtare për rrënimin e objekteve të ndërtuara pa leje ndërtimi, si dhe rrënimin e objekteve në të cilat është tejkaluar leja e ndërtimit.
Gjithnjë sipas aktakuzës, të akuzuarit në mënyrë të kundërligjshme dhe në kundërshtim me interesat dhe qëllimet e Komunës së Gjilanit, nuk kishin ekzekutuar masën për rrënimin e këtyre objekteve, duke iu mundësuar personave të ndryshëm përfitim pasuror.
