Foto: Kallxo.com
Gjilan, rigjykimi ndaj ish-inspektorëve dhe ish-drejtorit të urbanizmit drejt fundit
Inspektorët Merita Cana-Shabani, Shkëndije Mahmuti-Hajdini, Baki Azemi dhe ish-drejtori i Urbanizmit, Valon Shefkiu, dolën edhe sot para Gjykatës në Gjilan rreth disa ndërtimeve pa leje në këtë komunë.
Sipas Prokurorisë, katër të akuzuarit gjatë periudhës kohore 2013-2014, në Gjilan nuk kishin ndërmarrë veprime zyrtare për rrënimin e objekteve të ndërtuara pa leje ndërtimi, si dhe rrënimin e objekteve në të cilat është tejkaluar leja e ndërtimit.
Gjithnjë sipas aktakuzës, të akuzuarit në mënyrë të kundërligjshme dhe në kundërshtim me interesat dhe qëllimet e Komunës së Gjilanit, nuk kishin ekzekutuar masën për rrënimin e këtyre objekteve, duke iu mundësuar personave të ndryshëm përfitim pasuror.
Ky gjykim ishte urdhëruar nga Gjykata e Apelit pasi që Gjykata e Gjilanit i kishte liruar nga akuza të akuzuarit.
Në seancën e sotme u tha fjala përfundimtare.
Prokurori Arben Kadriu tha se fjalën përfundimtare e ka përgatitur me shkrim.
“Prokuroria qëndron pranë aktakuzës dhe konsideron që pas gjitha provave dhe shqyrtimeve do të vërtetohet se të akuzuarit i kanë kryer veprat penale që ua vënë në barrë aktakuza”, tha shkurt Prokurori Kadriu.
Përfaqësuesi i Komunës së Gjilanit Arben Mehmeti deklaroi se i bashkëngjitet ndjekjes penale dhe se do të kërkojnë kompensimin e dëmit.
Mbrojtësit e të akuzuarve deklaruan se fjalën përfundimtare e kanë përgatitur me shkrim dhe kërkuan që të akuzuarit të lirohen në mungesë të provave pasi që, sipas tyre, në asnjë rrethanë klientët e tyre nuk janë fajtorë.
Të akuzuarit than se e përkrahin fjalën përfundimtare të avokatëve të tyre.
Aktgjykimi për këtë çështje do të shpallet më 4 dhjetor.