Emri i Kadri Veselit përmendet në gjykimin për mashtrim

Në Gjykatën e Prishtinës është mbajtur seanca e gjykimit ndaj të akuzuarve për mashtrim në bashkëkryerje, Rrahim Hashimi dhe Kadri Rexhepi.

Në seancën e sotme ka dëshmuar i dëmtuari Faton Dalladaku.

Ai tha se të akuzuarit ia kishin marrë të hollat e gatshme që arrijnë shumën 840 mijë euro, në emër të blerjes së aksioneve të Qendrës Kardiake të Kosovës sh.p.k në Prishtinë.

I pyetur nga prokurorja Rukije Shesivari, dëshmitari tha se rastin në vitin 2012  nuk e kishte paraqitur në Polici duke shpresuar se të akuzuarit do t’ia kthenin mjetet. Mirëpo, meqë kishte dështuar një gjë e tillë, në vitin 2015 e kishte lajmëruar rastin.

Dalladaku theksoi se në vitin 2007, 2008 pa asnjë arsye dhe ndonëse e kishte pasur gjithë dokumentacionin në rregull i ishte pezulluar ndërtimi i spitalit.

Më tutje Dalladaku shtoi se “na kemi dashtë me pasë përkrahje politike që mos të kemi pengesa më tutje si më herët për realizmin apo implementimin e projektit. Fatkeqësisht ne spitalin të cilin e kam ndërtuar ende kam shantazhe, probleme të llojit të ndryshëm”.

Mirëpo, në pyetjen e të akuzuarit Rrahim Hashimi se a ka ndonjë lidhje apo kontakte me personat politikë, si Kadri Veseli dhe të tjerë, dëshmitari Dalladaku mohoi të ketë lidhje me këta persona.

Dalladaku rrëfen si iu kërkuan 300 mijë euro në emër të Kadri Veselit

Prokuroria e Ferizajt kishte ngritur aktakuzë në mars të vitit 2018 ndaj Hashimit dhe Rexhepit për mashtrim.

Aktakuza thotë se prej dhjetorit të vitit 2011 e deri në korrik 2012, të akuzuarit Rrahim Hashimi dhe Kadri Rexhepi, së bashku me Ekrem Likën, i cili është në arrati, kanë mashtruar tani të dëmtuarin Faton Dalladaku duke u prezantuar si të afërm të Kadri Veselit dhe Xhavit Halitit përmes Kadri Rexhepit.

Gjithnjë sipas aktakuzës qëllimi i prezantimit të rremë i të akuzuarve si të afërm të Kadri Veselit dhe Xhavit Halilit ishte ndërmjetësimi për blerjen e Qendrës Kardiake nga tani i dëmtuari Faton Dalladaku duke e shtyrë atë që të veprojë në dëm të pasurisë së tij.

Aktakuza thotë se atij i është paraqitur një certifikatë e pakompletuar e biznesit në të cilën rezultonte se Rrahim Hashimi dhe Ekrem Lluka ishin pronarë të Qendrës për Kardiologji duke i paraqitur një kontratë në të cilën rezulton se Rrahim Hashimi ishte pronar i 20 % të aksioneve në këtë qendër ndërsa Ekrem Lluka, pronar 80 % të aksioneve.

Pasi tani i dëmtuari Faton Dalladaku ishte i bindur se ata dy janë pronarë të Qendrës Kardiake ka nënshkruar kontratën për blerjen e kësaj Qendre në shumë prej 290.810.00 euro.