Dosja e Prokurorisë: Si kërcënoheshin serbët që ta votonin Listën Serbe më 6 tetor

Dy zyrtarë të komunës së Kllokotit kanë dalë para gjykatës në Gjilan të mërkurën për t’u përgjigjur në akuzat se po u bënin presion qytetarëve lokalë serbë që të votojnë Listën Serbe në zgjedhjet e jashtëzakonshme parlamentare të 6 tetorit.

Zyrtari i komunës së Kllokotit, Zharko Dejanoviq, dhe asistenti i tij, Vllasta Bogdanoviq, nuk e pranuan fajësinë kur u pyetën rreth akuzave të ngritura nga prokurori Agron Uka

Avokati Ilmi Qerimi tha se brenda afatit ligjor do ta bëjë kudnërshtimin e aktakuzës ndërsa kërkoi që të akuzuarit të lirohen nga paraburgimi.

“I propozoj gjykatës që të ndërpresë masën e paraburgimit për dy të akuzuarit pasi që janë plotësuar kushtet ligjore për çka ishte caktuar kjo masë”, tha avokati Qerimi.

Të akuzuarit u pajtuan me deklaratën e avokatit ndërsa kryetari i trupit gjykues, Zyhdi Haziri, vendosi që t’ua ndërpresë atyre masën e paraburgimit.

“Gjykata konsideron se kanë pushuar arsyet për çka edhe ishte caktuar paraburgimi, andaj ndërpritet kjo masë nga dita e sotme”, tha Haziri duke kumtuar vendimin për të cilin prokurori pati vërejtje.

Seanca e radhës për këtë rast pritet të mbahet gjatë nëntorit.

Sipas Prokurorisë, të akuzuarit Zharko Dejanoviq dhe Vllasta Bogdanoviq nga data 26 shtator deri më 2 tetor, në fshatin Vërbovc dhe Gërnqar të Komunes së Kllokotit, në vazhdimësi kanë kanosur të dëmtuarit Ognjen Krqmareviq, Sreçko Kojiq dhe Jelica Krqmareviq.

Ata akuzohen se përderisa ishin ne veturë zyrtare të komunës, e kishin ftuar të dëmtuarin Sreçko Kojiq, duke i kërkuar të hyjë në veturë pa dëshirën e tij dhe kishin filluar të bisedojnë për zgjedhjet, duke i kërkuar që të kthehet në krahun e Listës Serbe dhe të heqë dorë nga Partia e Pavarur Liberale (SLS).

Aktakuza thotë se kur janë afruar tek udhëkryqi afër fshatit Gjylekarë pasi të akuzuarit e kishin ngadalësuar veturën për shkak të disa pengesave në rrugë, i dëmtuari kishte arritur të dalë nga vetura.

Aktakuza gjithashtu thotë se dy të akuzuarit ia kishin kontrolluar veturën të dëmtuarit Ognjen Krqmareviq duke u interesuar nëse brenda saj kishte material zgjedhor kundër Listës Serbe.

Prokuroria thotë se Dejanoviq dhe Bogdanoviq e kishin kërcënuar Krqmareviqin duke i thënë se nëse nuk voton për Listën Serbe “do të ndodh pastrim”.

Aktakzua gjithashtu thotë se më 30 shtator, të dëmtuares Dr. Jelica Krqmaroviq, nëna e të dëmtuarit Ognjen Krqmareviq, pas 36 viteve përvojë pune, i është ndërprerë kontrata e punës nga Drejtoria për Shëndetësi në Pasjak vetëm pse ka qenë përkrahëse e partisë SLS nën udhëzimet e të akuzuarit Zharko Dejanoviq i cili është edhe vëllai i kryetarit të Komunës së Kllokotit.

Lista Serbe ka fituar mbi 95% të votave të serbëve të Kosovvs më 6 tetor ndvrsa është raportuar se ka arritur t’i sigurojë 10 deputetë në mandatin e ardhshëm në Kuvendin e Kosovës.