Detaje nga gjykimi ndaj Senad Ramajt i akuzuar për shitjen e automjeteve të `Eco Higjienës` për skrap
Seanca ndaj Senad Ramajt, drejtor i kompanisë “Eco Higjiena”, i akuzuar për keqpërdorim të detyrës zyrtare nuk është mbajtur në Gjykatën e Gjilanit.
Shkak për dështimin e seancës së sotme ishte mungesa e dëshmitarit Fidan Hasani, i cili nuk ishte në seancë për të dhënë dëshminë e tij.
Sipas aktakuzës, Senad Rama, në pozitën e anëtarit të Bordit të Drejtorëve të kompanisë së mbeturinave “Eco Higjiena”, duke shfrytëzuar detyrën dhe autoritetin zyrtar, ka shitur për mbeturina hekuri shtatë automjete dhe kontejnerë, pronë e kësaj kompanie, në shumën prej 16,249.30 euro.
Aktakuza thotë se këto asete janë shitur pa i përfillur procedurat e vlerësimit dhe konstatimit të gjendjes së tyre teknike dhe vlerës së tyre reale, ndërsa shitja e tyre e kishte dëmtuar kompaninë për 64,327.53 euro.
Gjykata e Gjilanit, më 15 nëntor 2018, në mungesë të provave e kishte liruar nga akuza Senad Ramën, por Gjykata e Apelit në maj të këtij viti e kishte kthyer këtë rast në rigjykim pas ankesës së Prokurorisë.
Sipas Gjykatës së Apelit, aktgjykimi i Gjykatës në Gjilan është i paqëndrueshëm, pasi përmban shkelje esenciale të dispozitave të procedurës penale.
Në seancën e sotme, kryetari i trupi gjykues Aziz Shaqiri tha se “Dëshmitari e ka njoftuar Gjykatën se nuk mund të jetë prezent në gjykim për shkaqe shëndetësore”.
Tutje Prokurori Isuf Sadiku tha se “Pasi që nuk është prezent dëshmitari Fidan Hasani unë si përfaqësues i aktakuzës propozoj që seanca e sotme të shtyhet me qëllim të mos shkeljes së Kodit të Procedurës Penale”.
Gjithashtu mbrojtësi i të akuzuarit Senad Rama, avokati Engjëll Rexhepi tha se “Pajtohet me mendimin e Prokurorit të shtetit pasi që edhe vërejtjet e Gjykatës së Apelit kanë qenë pikërisht në dëgjimin e dëshmitarit Fidan Hasani”.
Gjykatësi Shaqiri në fund tha se “Dëshmitari Hasani do të ftohet edhe njëherë dhe nga i njëjti do të kërkohet arsyetim për mungesën e sotme. I njëjti nëse nuk përgjigjet për seancën tjetër do të sillet në mënyrë të detyruar”.
Seanca që është dashur të mbahet sot u shtye për muajin mars.
Kallxo.com ka raportuar edhe më parë për këtë rast:
Dëshmi të reja në rigjykimin për automjetet e kompanisë të shitura për hekur në Gjilan
.