Dëshmia e punëtorit të sigurimit për kamerat e sigurisë në ditën kur ishte vrarë Marigona Osmani

Dardan Krivaça dhe Arbër Sejdiu, të akuzuar nga Prokuroria për vrasjen e Marigona Osmanit, sot në Gjykatën e Ferizajt janë përballur me deklaratën e dëshmitarit Besart Mani, i cili në kohën kur ka ndodhur rasti ka punuar në kompaninë e sigurimit, prej të cilës i akuzuari Krivaça kishte kamerë sigurie në banesën ku pretendohet se është kryer vepra.

Dëshmitari në seancë pohoi se në banesën e të pandehurit, konkretisht në korridor, e drejtuar nga banjo e banesës, ka pasur kamerë sigurie të kompanisë ku dëshmitari punonte.

Ai deklaroi se në ditën kritike, mbikëqyrësit e tij i kishin caktuar detyrën që të shkonte në banesën e të pandehurit me qëllim që të kthehen incizimet e kamerave, me kërkesë të klientit, pra të Dardan Krivaçës.

Dëshmitari deklaroi se të njëjtën kërkesë ja ka paraqitur edhe i akuzuari Dardan Krivaça, kur dëshmitari kishte mbërritur në banesë.

I pyetur nga kryetari i trupit gjykues se a i kishte kërkuar Dardani që të fshinte incizimet, dëshmitari u përgjigj se ‘asnjëherë’ nuk i ishte kërkuar një gjë e tillë.

Gjithashtu dëshmitari përshkroi se kur kishte hyrë në banesë në ditën kritike, çdo gjë i është dukur e zakonshme, por i njëjti përmendi se ka vërejtur një erë jo të zakonshme që s’ka mundur ta dallojë se çka.

Rasti që ka tronditur opinionin publik ka ndodhur më 22 gusht 2021.

Një 18 vjeçare ishte dërguar pa shenja jete në Spitalin e Ferizajt.

Bëhej fjalë për Marigona Osmanin, e cila sipas Prokurorisë ishte vrarë mizorisht nga Dardan Krivaça dhe Arbër Sejdiu.

Dosja e Prokurorisë

Në aktakuzën e Prokurorisë të siguruar nga KALLXO.com tregohet se si kamerat e sigurisë që kanë qenë të vendosura në banesën e të pandehurit Krivaça, ka bërë që Prokuroria të sigurojë prova të forta për netët para ngjarjes fatale e për mënyrën se si u organizua dhunimi, e më pas vrasja e 18-vjeçares.

Sipas konstatimit të Prokurorisë, në korridor të banesës së të pandehurit ka pasur të vendosur një kamerë sigurie, e cila regjistronte 24 orë e që ka xhiruar edhe momente të ngjarjes.

“Regjistrimi ka kohën e saktë, kamera ka pamje nga dera e hyrjes së banesës dhe banjo, e njëjta ka pamje edhe të një pjese të derës së një dhome gjumi, si dhe një dhomë tjetër të cilën e kap vetëm një qosh, kjo e fundit edhe është dhoma ku janë kryer veprat penale”- përshkruhet në aktakuzë.

“Policia ka marr DVR, e njëjta është dërguar për ekzaminim, ku janë tërhequr pamjet për periudhën kohore prej shtatëdhjetë e dy orë dhe atë nga data 19.08.2021 ora 00:05 deri më 23.08.2021 ora 00:18”- përshkruan aktakuza e Prokurorisë, e cila detajon edhe kohën e saktë dhe veprimet e dy të pandehurve brenda banesës.

Në aktakuzë theksohet se Prokuroria e ka konsideruar videon të besueshme dhe ngjarja është regjistruar prej datës 19 gusht 2021.

“Ne e konsiderojmë videon të besueshme dhe të saktë, videoregjistrimet tregojnë se në fillim, konkretisht, më 19.08.2021, raportet në mes të pandehurit Dardan Krivaça dhe të ndjerës kanë qenë të mira, këto raporte fillojnë të përkeqësohen kur aty paraqitet i pandehuri Arbër Sejdiu, i cili vije në orën 16:18, së bashku me Dardanin, ku me vete ka një çantë me rroba, në orën 19:02, të pandehurit bisedojnë lidhur me kamerat, si dhe shikojnë se cilat pjesë të korridorit i kap kamera ku lëvizin në pjesë të ndryshme për të verifikuar se cilat pjesë të korridorit i kap kamera dhe vërehet se rolin apo fjalën kryesore për këtë e ka Arbër Sejdiu, në orën 19:56, Arbëri merr rrobat e tij dhe del nga banesa së bashku me Dardanin”- shkruhet në aktakuzën e Prokurorisë.

Prokurori në aktakuzën e përpiluar, ka përshkruar se si është organizuar dhunimi e më pas vrasja e Marigona Osmanit.

“Më 21.08.2021, ora 02:40, Dardan Krivaça, pas mesnate deri sa është në banjë me të ndjerën Marigona Osmani, e godet me dorë në fytyrë, 04:52, dalin nga banesa, 09:53, i pandehuri Dardan Krivaça dhe e ndjera Marigona Osmani, kthehen ku vërehet se e ndjera nuk ka kontroll të plotë, i merren mendtë, 10:02, i pandehuri e dërgon në banjë të ndjerën Marigona Osmani, del në ora 10:14, ku vërehet se e njëjta reziston, mirëpo është kapur me duar dhe shtyhet me forcë drejt sallonit, 10:48, e dërgon me forcë në banjë, ku e ndjera është e zhveshur, ndërsa i pandehuri është veshur ku qëndrojnë deri në orës 11:09, kur dalin i pandehuri është zhveshur, dhe të ndjerën me dhunë e nxjerr nga banjë dhe e dërgon në dhomën e gjumit, 13:43, i pandehuri i cili është zhveshur i vendos kamerës një kapelë e cila mbulon pamjen deri në orën 19:57”- përshkruhet në aktakuzë.

Prokuroria e Ferizajt ka ngritur aktakuzë me datë 28.06.2022 ndaj Dardan Krivaçës dhe Arbër Sejdiut të dyshuar për vrasjen mizore të Marigona Osmanit.

Raportimet e KALLXO.com për këtë rast mund t`i lexoni duke klikuar në LINK.