Deputeti lirohet nga akuza për sulm dhe kanosje

Gjykata e Prizrenit ka liruar nga akuza e sulmit dhe e kanosjes të akuzuarin Adem Hodza, deputet në Kuvendin e Kosovës.

Një gjë të tillë për KALLXO.com e ka konfirmuar edhe avokati i tij, Hajrip Krasniqi.

“Po, është e vërtetë, klienti im është liruar nga akuza për dy veprat penale”, tha avokati Krasniqi për KALLXO.com

Adem Hodza akuzohej nga Prokuroria e Prizrenit se më 26 nëntor 2017 ka sulmuar fizikisht Fatir Berzatin.

Hodza, deputet nga komuniteti goran, pjesë e grupit parlamentar 6+, po akuzohej për dy vepra penale, sulm dhe kanosje.

Sipas aktakuzës së ngritur më 20 shkurt 2018 nga Prokuroria e Prizrenit, Adem Hodza akuzohet se më 26 nëntor 2017, në selinë e Partisë së Bashkuar Gorane (JPG) në Dragash, me dashje ka përdorur forcë ndaj personit tjetër.

Në aktakuzë thuhet se ngjarja ka ndodhur derisa të dëmtuarit Berzat Berzati dhe Fatir Berzati kishin shkuar në selinë e partisë, ku fillimisht e kishin përshëndetur kryetarin e partisë, tani të pandehurin Adem Hodza, ku ky i fundit i është drejtuar me fjalët “ti nuk meriton të më përshëndetësh mua”.

Gjithnjë sipas aktakuzës, gjatë bisedës, i pandehuri Adem Hodza është ngritur nga ulësja dhe i është drejtuar tashmë të dëmtuarit Berzat Berzati “ti del në rrugë, sepse nuk je anëtar i partisë dhe nuk ke të drejtë të qëndrosh aty”.

Sipas aktakuzës, i dëmtuari Berzati duke dalë jashtë, goditet me shqelma mbrapa nga i pandehuri dhe më pas ai e godet me grushte dhe shuplaka në fytyrë edhe të dëmtuarin Fatir Berzati.

Sipas aktakuzës, kanosja bëhet në atë mënyrë që u drejtohet me fjalët “ty dhe vëllanë tënd kam me ju zhduk, ju keni me qenë shembull për të tjerët, familja ime është e rrezikshme” dhe kishte vazhduar me tutje me fjalët “ti dhe vëllai yt do ta mbani në mend se kush është Adem Hoxha, he ja u q***n***, r***”, gjë që, sipas prokurorisë, te të dëmtuarit ka shkaktuar ndjenjën e frikës, ankthit dhe pasigurisë.

Ish-zëvendësministri ankohet në gjykatë se është i kërcënuar