Prapa grilave - Ilustrim
Dënohet me 3 vjet e 8 muaj burgim i akuzuari për terrorizëm
Gjykata e Prishtinës, ka shpallur fajtor K. D. për veprën penale organizim dhe pjesëmarrje në grup terrorist.
Të pandehurit K. D. i është shqiptuar dënim me burgim në kohëzgjatje prej 3 vite e 8 muaj, në të cilin do t’i llogaritet edhe koha e kaluar në paraburgim.
Ndaj të njëjtit është vazhduar edhe masa e paraburgimit deri sa aktgjykimi të bëhet i plotfuqishëm, mirëpo paraburgimi nuk mund të vazhdojë më gjatë se sa burgimi prej 3 vite e 8 muaj.
Prokuroria Speciale aktakuzën ndaj të pandehurit K. D. e ka ngritur më 7 dhjetor 2021.
Sipas prokurorisë i pandehuri K. D., së bashku me bashkëshorten e tij ishin bashkuar në ISIS, ndërsa i njëjti ishte arrestuar dhe ishte burgosur nga Forcat Demokratike Siriane, ndërsa më 17 korrik të këtij viti është transferuar në Kosovë.
KALLXO.com ka raportuar vazhdimisht për aktakuzat e ngritura nga ana e Prokurorisë Speciale në lidhje me kosovarët të cilët janë rikthyer nga zonat e luftës në Siri e Irak.
Të njëjtit po ballafaqohen me sistemin e drejtësisë në Kosovë për vepra të ndryshme që lidhen me terrorizëm.