Burgim me kusht për gruan nga Podujeva që ishte paguar nga ISIS-i
Gjykata e Prishtinës gjeti fajtore Qëndresa Sfishtën për veprën penale organizim dhe pjesëmarrje në terrorizëm dhe e dënoi me 2 vjet burgim, i cili dënim nuk do ekzekutohet nëse brenda 2 viteve nuk kryen vepër penale.
Paraprakisht e akuzuara Sfishta kishte pranuar fajësinë mëngjesin e sotëm.
Gruaja kosovare pranon fajin se iu bashkua ISIS-t në Siri
Prokuroria Speciale e akuzonte Qëndresa Sfishtën, nga Podujeva se e njëjta në moshën 25 vjeçare së bashku me burrin e saj Artan Arapin, kishin përkrahur organizatën terroriste ISIS.
Sipas aktakuzës Sfishta me 15 prill të 2015, kishte lëshuar territorin e Republikës së Kosovës, ku me taksi nga Prishtina përmes pikës kufitare ‘’Hani i Elezit’’ bashkë me burrin e saj Artan Arapi kishin shkuar në aeroportin e Shkupit nga ku kishin fluturuar për në Turqi dhe pastaj në Siri.
Qëllimi i këtij udhëtimi ishte bashkimi në organizatën terroriste ISIS, për ta detyruar qeverinë e Sirisë dhe qeveritë e shteteve të tjera që të krijojnë shtetin islamik.
Sipas aktakuzës, Qëndresa Sfishta duke përdorur shumën e rregullt mujore prej 200 $,i kishte ofruar shërbime logjistike burrit të saj, i cili aktivisht kishte marrë pjesë në luftërat e ISIS-it, e vazhdimisht duke ndërruar edhe vendbanimin varësisht nga ndryshimi i territorit të shtetit islamik, duke kaluar nga Siria në Irak dhe anasjelltas derisa ISIS kishte pësuar disfatën e plotë kur kanë qenë të detyruar të dorëzohen te forcat kurde të cilët pastaj me ndihmën e ushtrisë amerikane i kanë deportuar në prill të vitit 2019 në Kosovë.
Nga data 24 maj 2019, e akuzuara Qëndresa Sfishta deri me 25 qershor 2019 ishte në arrest shtëpiak.