Arkiv - Kryetari i komunës së Istogut, Haki Rugova, në gjyq. Foto: Kallxo.com
Apeli liron nga akuza për korrupsion ish kryetarin e Istogut, Haki Rugova
Gjykata e Apelit e ka liruar nga aktakuza për konflikt interesi, ish kryetarin e Komunës së Istogut, Haki Rugovën.
Rugova ishte dënuar nga shkalla e parë me 1 vit burgim efektiv.
Sipas burimeve të KALLXO.com Apeli ka marrë aktgjykim lirues ndaj Rugovës për këtë rast.
Haki Rugova akuzohej se në cilësinë e kryetarit të Komunës së Istogut ka nënshkruar kontratë me kompaninë e vëllait të tij, “Ma-Con” sh.p.k. për ndërtimin e kanalizimit për fshatrat Cercë dhe Lubozhdë, në vlerë rreth 289 mijë euro.
Aktakuza ndaj Rugovës, ishte ngritur me mars të vitit 2018, e që procesi gjyqësor zgjati më shumë se 3 vite.
Kryetar i trupit gjykues, në rastin e Rugovës, ishte gjykatësi Sami Sharraxhiu, ndërsa aktakuzën e ka përfaqësuar prokurori Ali Uka.
“Agjencia Kundër Korrupsionit më 11 gusht 2017, ka pranuar informacionin nga Rrjeti Ballkanik i Gazetarisë Hulumtuese ‘BIRN’ dhe ‘Interneës Kosova’ ndaj Haki Rugovës për shkak të mundësisë së veprës penale konflikt i interesit”, thuhej në arsyetimin e kallëzimit penal të Agjencisë.
Ai dyshohej se më 1 gusht 2014 në cilësinë e kryetarit të Komunës së Istogut me dashje ka marrë pjesë personalisht në nënshkrimin e kontratës ‘Ndërtimi i kanalizimit fekal në fshatin Cerrcë – Lubozhdë – faza e parë”.
Tenderin për ndërtimin e këtij kanalizimi e fitoi “’MA-CON’ sh.p.k, në pronësi të Gani Rugovës (vëllai i Haki Rugovës), në vlerë prej 289,119.85 euro, duke mundësuar kështu interes financiar për të (Haki Rugovën) dhe personin juridik që ka të bëjë me të.
Rugova është duke u hetuar edhe për një rast tjetër penal pranë prokurorisë së Pejës.
Më poshtë mund ta ndiqni hulumtimin e emisionit ‘Drejtësia në Kosovë’ i publikuar në vitin 2017-të, pas të cilit hulumtim ishte ushtruar kallëzim penal nga Agjensioni Kundër Korrupsion në Prokurorinë e Pejës për konflikt interesi ndaj Haki Rugovës:
