Foto: KALLXO.com

Aktakuza: Të akuzuarit tentuan t’i vrisnin të dëmtuarit me thikë e kaçavidë

Në Gjykatën e Gjilanit është mbajtur shqyrtimi fillestar në rastin e të akuzuarve për tentim vrasje, e cila sipas Prokurorisë ka ndodhur më 25 qershor të këtij viti.

Sipas aktakuzës, Agon Murseli dhe Edon Murseli pas një mosmarrëveshjeje, në bashkëkryerje dhe me planifikim, me thikë e kaçavidë, kanë tentuar të privojnë nga jeta fillimisht të dëmtuarin A.K. dhe pastaj edhe të dëmtuarin tjetër L.K.

Rasti ka ndodhur në Viti.

Sipas Prokurorisë, të akuzuarit pasi i kanë sulmuar të dëmtuarit janë larguar nga vendi i ngjarjes.

Në seancën e sotme prokurori Arben Kadriu e lexoi aktakuzën dhe i njoftoi të akuzuarit se për çfarë vepra penale akuzohen.

Në deklarimin rreth fajësisë i akuzuari Agon Murseli deklaroi se e pranon fajësinë për akuzën e sulmit ndaj të dëmtuarit të parë A.K. dhe për akuzën e mbajtjes në pronësi të armës, ndërsa sa i përket akuzës se e ka sulmuar të dëmtuarin L.K. i akuzuari tha se nuk e pranon fajësinë.

Në deklarimin rreth fajësisë i akuzuari Edon Murseli nuk e pranoi fajësinë për asnjë akuzë që i ngarkohet nga Prokuroria.

Mbrojtësi i të akuzuarit Agon Murseli, avokati Sahit Musa, deklaroi se e mbështet pranimin e fajësisë nga klienti i tij.

Ndërsa, mbrojtësi i të akuzuarit Edon Murseli, avokati Shemsedin Pira, deklaroi se në shqyrtim gjyqësor do të vërtetohet versioni i të akuzuarit, i cili nuk e pranon fajësinë për veprat penale për të cilat akuzohet.

Duke qenë se Prokuroria i akuzon të akuzuarit se veprat penale të tentim vrasjes ndaj të dëmtuarve i kanë kryer në bashkëveprim, Gjykata e refuzoi pranimin e fajësisë të të akuzuarit Agon Murseli për veprën penale tentim vrasje ndaj të dëmtuarit A.K., ndërsa e aprovoi pranimin e fajësisë të të njejtit të akuzuar për veprën penale të mbajtjes në pronësi të armës.

Vlen të theksohet se mbrojtësit e të akuzuarve deklaruan se familjet e të akuzuarve dhe të dëmtuarve në bazë të traditave vendore janë pajtuar me njëra tjetrën.

Mbrojtësit e të akuzuarve deklaruan që ky fakt duhet të merret parasysh nga Gjykata që të mos u vazhdohet masa e paraburgimit të akuzuarve, duke qenë se gjenden në paraburgim.

Gjyqtari Aziz Shaqiri i njoftoi palët lidhur me afatin për kundërshtimin e provave. Kështu Gjykata vendosi të përfundojë shqyrtimin fillestar për këtë çështje penale dhe shqyrtimi gjyqësor do të vazhdojë në datë tjetër.

Do NOT follow this link or you will be banned from the site!