5 vite burg për vrasjen e bashkëshortes
Xhafer Shkodra është dënuar me burg me dënim unik prej 5 vite e dy muaj për vrasje nga pakujdesia dhe për armëmbajtje pa leje.
Prokuroria fillimisht akuzonte Xhafer Shkodren për vrasje të rëndë, se duke pastruar armën kishte qëlluar ish-gruan e tij, Rabe Shkodra.
Në seancën e fjalës përfundimtare, prokurori i rastit Ali Uka bëri rikualifikimin e veprës penale dhe më pas i akuzuari Xhafer Shkodra kishte pranuar fajësinë.
Në muajin e kaluar, kishte dhënë mbrojtjen i akuzuari Xhafer Shkodra.
Në këtë rast kishte dëshmuar vëllai i të ndjeres, Rabe Shkodra.
Xhafer Shkodra, po akuzohet për vrasjen e bashkëshortes së tij, Rabe Shkodra nga afërsia.
Aktakuza e Prokurorisë, deri më sot e rëndonte Xhafer Shkodrën për veprën penale të vrasjes së rëndë dhe për armëmbajtje pa leje.
Në seancën e shqyrtimit fillestar, i akuzuari Xhafer Shkodra ishte deklaruar i pafajshëm.
Ai kishte thënë se nuk ka pasur për qëllim ta vrasë gruan e tij dhe se e njëjta ishte vrarë “pa hiri”.
Xhafer Shkodra gjendet në paraburgim që nga data 20 gusht 2018.
Sipas aktakuzës, për shkaqe ende të panjohura derisa i pandehuri Xhafer Shkodra dhe bashkëshortja e tij Rabe Shkodra ishin duke qëndruar në ballkonin e shtëpisë së tyre, i njëjti me një gjuajtje në gjoks në afërsi të drejtpërdrejt e vret atë.
Aktakuza thotë se i pandehuri pas këtij momenti menjëherë është larguar ndërsa fëmijët e kishin dërguar nënën e tyre në Spitalin Rajonal të Gjakovës.