Soliterët në Ulpianë
Zvarritja e renovimit të fasadës së 'Soliterëve'
Në mars të vitit të kaluar Komuna e Prishtinës njoftoi se në bashkëpunim me Korporatën e Sfidës së Mijëvjeçarit (MCC) do bëjë renovimin e fasadave dhe përmirësimin e efikasitetit të energjisë elektrike te ‘Soliterët’ në lagjen ‘Ulpiana’.
Përfaqësuesi i MCC-së, Petrit Selimi, gjatë vitit të kaluar në një konferencë përe media me ish-kryetarin e Prishtinës, Shpend Ahmeti, kishte deklaruar se 60% e investimit do mbulohet nga MCC, 30% nga komuna dhe 10% Ndërmarrja Banesore dhe banorët.
Atë kohë u tha se ka mbetur të zgjidhet fasada dhe të nis procesi i tenderimit, derisa punimet pritej të përfundonin në pranverën e vitit 2022.
Ka kaluar gati një vit nga konferenca lidhur me këtë investim, por në teren nuk ka ndryshuar asgjë.
Rina Meta nga MCC në një përgjigje për KALLXO.com deklaroi se fasada për ‘Soliterët’ është përzgjedhur në pajtim me të gjitha palët e përfshira, ku është vendosur të ruhet identiteti i këtyre ndërtesave ikonë të qytetit.
“Fasadën për ‘Soliterët’ e kemi përzgjedhur në bashkëpunim me projektin ‘KEREP’ të financuar nga Banka Botërore (ky projekt paraprakisht ka bërë auditimin energjetik të këtyre ndërtesave), NPB-ja dhe Komuna e Prishtinës. Në pajtim me gjitha palët e involvuara, kemi vendosur për ruajtjen e pamjes burimore të këtyre ndërtesave duke rritur fundamentalisht efiçencën energjetike dhe kursimin e rrymës”, ka thënë Meta.
Sipas saj, vonesat për implementim të këtij projekti kanë pasur të bëjnë me zgjedhjen e fasadës (pasi donin të ruajnë identitetin), analizat për përmbajtjen e mundshme të azbestit si dhe aprovimi nga banorët.
“Trajtimi i ndjeshëm i fasadës por edhe analizat jashtë vendit për përmbajtjen e mundshme të azbestit, involvimi dhe aprovimi i nevojshëm i disa palëve në projekt, duke i përfshirë edhe banorët e këtyre ndërtesave, e kanë zgjatur procesin e para-implementimit”, shtoi tutje Meta.
Ajo me tej theksoi se janë në fazën e shpalljes së prokurimit, derisa projekti duhet të përfundojë në në fund të shtatorit 2022.
“Momentalisht jemi në fazën e shpalljes të prokurimit, ku së shpejti do t’i përzgjedhim kompanitë ndërtimore të cilat do të trajnohen nga projekti ynë për implementimin e Masave të Efiçiencës në këto ndërtesa shumë-banesore. Sipas planit të përmbylljes së projekteve të aprovuara nga MCC, ky projekt duhet të përfundojë më 31 shtator 2022″, potencoi Meta.
Sipas Metës, tashmë kanë mbajtur takim me kryetarin e Prishtinës, Përparim Rama për këtë projekt.
“Ne kemi mbajtur takim me Komunën e Prishtinës dhe kryetarin e ri Përparim Rama dhe jemi në komunikim të vazhdueshëm për zhvillimet në lidhje me renovimit e ‘Soliterëve'”, shtoi Meta.
KALLXO.com ka kërkuar edhe pamje të projektit të përzgjedhur për fasadat, por këto nuk janë dërguar nga ana e tyre.
Tek pesë ‘Soliterët’ pritet të ketë investim deri në 2 milionë euro, kurse në total me investimin në efiçiencë të energjisë (që është projekt i veçantë) deri në 10 milionë euro.
Sipas të dhënave, do të rinovohet i tërë mbështjellësi i ndërtesave (fasada dhe dritaret), kulmet, hapësirat e përbashkëta, si dhe Ndërmarrja Publike Banesore ka marrë përsipër të rregullojë problemet me instalime të ujit dhe kanalizimit aty ku është e nevojshme.
Nga NPB-ja është thënë që në këto punime do ketë pjesëmarrje simbolike në financim edhe nga banorët, pagesa e saktë nga ana e banorëve do të dihet vetëm pasi të mbarojë procesi i tenderimit të kompanive ndërtimore.
Prishtina është një nga shtatë komunat e zgjedhura për investim në objekte të vjetra shumëkatëshe që po bëhen me ndihmë të MCC-së.
Komunat tjera përfituese të këtij aktiviteti specifik, në kuadër të projektit “Subvencione për Efiçencë të Energjisë në Kosovë – SEEK” janë Lipjani, Mitrovica, Novobërda, Vitia, Gjakova. SEEK implementohet dhe mbikqyret nga kompania gjermane GFA.