Foto: ZRrE
ZRrE vendos për çmimin e rrymës për vitin 2020
Zyra e Rregullatorit për Energji (ZRrE) ka vendos që mos të ketë shtrenjtim të energjisë elektrike në vitin 2020.
Në seancën e cila është mbajtur sot, Bordi ka miratuar të Hyrat e Lejuara Maksimale (MAR) të operatorëve të Transmetimit/Tregut (KOSTT), Operatorit të Shpërndarjes (KEDS) dhe Furnizimit Universal (KESCO) me energji elektrike.
Të hyrat e vendosura për këto kompani për periudhën prill 2020 – mars 2021 është vendosur të jetë 268.9 milionë euro. Këto të hyrat mund të mblidhen me tarifat aktuale të energjisë elektrike.
Fillimisht propozimi i ZRrE ishte që të Hyrat e Lejuara Maksimale për vitin 2020 të jenë 273.3 milionë euro.
Sipas ZRrE-së, kjo shifër prej 268.9 milionë paraqet shumën që do të mbulohet nga tarifat e rregulluara të shitjes me pakicë, nga 1 prilli i këtij viti deri në fund të muajit mars të vitit 2021.
Propozimi fillestar i KESCO-s ka qenë që të hyrat maksimale të jenë 303 milionë euro.
“Me aplikimin e tarifave aktuale mbi përcaktuesit e faturimit të parashikuar për vitin 2020, priten të hyra të faturuara në vlerë prej 275.91 milionë euro”, thuhet në aplikacionin e KESCO-së.
Ndërsa, pasi ishte publikuar propozimi i ZRrE-së, KESCO kishte e kishte ulur kërkesën për MAR, në 284 milionë euro.
“Duke marr parasysh të lartë-thënat, propozimi përfundimtar për të hyrat maksimale të lejuara për vitin 2020 për FSHU-në, të cilat duhet të konsiderohen nga ZRRE-ja janë 284.6 milion€”, thuhet në raportin me komente të dorëzuar nga KESCO në ZRrE.
Me këtë rast Bordi ka kërkuar nga operatorët që, bazuar në të hyrat e lejuara, të dorëzojnë sa më shpejt që është e mundur, kërkesat për tarifat e reja të cilat do të miratohen në seancën e ardhshme të Bordit, e që do të duhej të mbahej para përfundimit të kësaj periudhe të faturimit të energjisë elektrike.
Pjesë e shqyrtimit në këtë Seancë ka qenë edhe Amendamentimi i Rregullës së Taksave.
“Qëllimi i kësaj Rregulle është që t’i specifikojë llojet dhe shumën e taksës të përcaktuar në Nenet 23 dhe 24 të Ligjit për Rregullatorin e Energjisë, me qëllim të mbledhjes së të hyrave për Rregullatorin”, thuhet në njoftimin e ZRrE-së.
Pjesë e amendamentit që është aprovuar nga Bordi në këtë seancë ka qenë vlera e Taksës Fillestare të Licencës për Furnizim me energji elektrike, e cila nga 8 mijë euro sa ka qenë është vendosur të ulet në 2 mijë euro.
Po ashtu, Bordi ka shqyrtuar edhe disa kërkesa të kompanive, për shtyrje të afateve të vlefshmërisë së Autorizimeve Finale për ndërtimin e kapaciteteve të reja të gjenerimit nga Burimet e Ripërtritëshme të Energjisë (BRE).
Këto kërkesa Bordi i ka aprovuar si të arsyeshme dhe që kanë mbështetje në legjislacionin në fuqi, me përjashtim të njërës e cila është shtyrë për një seancë të ardhshme kur pritet të sjellën dëshmitë e nevojshme të parapara me legjislacion.
Bordi ka aprovuar edhe një kërkesë për ndërtim të kapaciteteve gjeneruese për vet konsum nga panelet solare, në kapacitet prej 4.8 kW, në Komunën e Rahovecit, si dhe ka shqyrtuar një numër të ankesave të konsumatorëve.