Zemaj: LDK do të jetë shumë e fuqishme në zgjedhjet lokale
Anëtari i Kryesisë së LDK-së, Armend Zemaj, ka deklaruar pas mbledhjes së Kryesisë se tema kryesore e diskutimit ishin zgjedhjet lokale dhe propozimin e kandidatëve për kryetarë komunash.
Zemaj në një prononcim për media deklaroi se shumica e kryetarëve aktualë në komuna janë rikandiduar.
“U dha vlerësimi për disa komuna për funksionimin, avancimin e tyre. Ishte një numër i të nominuarve për kryetar. Shumica janë rikandiduar. Diskutuam për organizimin nëpër degë, përgatitjen për asamble, forumin e gruas, forumin e rinisë, raportuan grupet punuese të cilat kanë punuar gjatë këtyre ditëve për fuqizimin e LDK-së dhe ecjen e mëtutjeshme”, ka thënë Zemaj.
Tutje ai shtoi se ka besim të plotë se Lidhja Demokratike e Kosovës do të jetë shumë e fuqishme në zgjedhjet lokale.
Data e zgjedhjeve lokale ende nuk është dekretuar nga ana e presidentes.
Javën e kaluar, presidentja e vendit ka mbajtur takim me të gjitha partitë lidhur me datën për mbajtjen e zgjedhjeve lokale.