Zbulohet busti i heroit Rrustem Bruqi në Isniq të Deçanit, Kurti: Lum Kosova që e pati ushtar të saj

26 vjet pas rënies së tij, është përuruar busti i heroit Rrustem Bruqi në sheshin i cili mban të njëjtin emër në fshatin Isniq të Deçanit.

Në këtë ngjarje mori pjesë zëvendëskryeministrja e Kosovës njëherësh ministrja e Punëve të Jashtme dhe Diasporës, Donika Gërvalla Schwarz.

Sipas njoftimit të Zyrës së Kryeministrit, kryeministri Albin Kurti e kishte të pamundur që të jetë i pranishëm në këtë ceremoni, prandaj i ka përcjellur familjes Bruqi një telegram.

“Në pamundësi për të qenë i pranishëm, kryeministri i Republikës së Kosovës, Albin Kurti, i përcolli familjes Bruqi një telegram të cilin e lexoi moderatori i ceremonisë, Shkodran Imeraj” – thuhet në komunikatën e ZKM-së më 03.08.2024, e cila nuk ka specifikuar arsyen e mospjesëmarrjes.

Në letrën e tij, Kurti ka thënë se i vjen mirë që figura e Bruqit prej patrioti po lartësohet e fiksohet në një vepër arti.

“Lum familja Bruqi dhe Isniqi që e rriti e formoi dhe lum Kosova që e pati ushtar të saj deri në vdekjen e tij, Rrustem Bruqin, dëshmorin e lirisë së Kosovës. Lavdi Rrustem Bruqit dhe të gjithë dëshmorëve të lirisë” – ka shkruar Kryeministri në letrën dërguar familjes Bruqi.

I biri i heroit, Leonis Bruqi është shprehur krenar për veprën e babait të tij.