Walker: Ditë e trishtueshme për Kosovën

Ish-ambasadori i OSBE-së gjatë luftës në Kosovë, William Walker, ka pritur me “shqetësim të madh” ngritjen e aktakuzave ndaj ish-krerëve të UÇK-së dhe udhëtimin e tyre në Hagë.

“Shqetësohem për Kosovën”, ka thënë Walker, teksa ka komentuar zhvillimet dramatike të ditës së sotme.

Ai ka theksuar se sot “është një ditë e trishtueshme për kosovarët”, ndërsa përgjigjen pozitive të ish-krerëve të UÇK-së për ftesat e Speciales e ka cilësuar si “gjëja më e mirë që mund të ketë ndodhur”.

Tutje, Walker ka pasur kritika për Prokurorinë e Specializuar në Hagë.

“E kam thënë këtë më herët, nuk jam ndonjë tifoz i Prokurorisë Speciale. Tashmë kanë kaluar 5 vjet dhe tashmë kemi një numër aktakuzash… Kritika ime ndaj gjithë këtij procesi është që në thelb. Janë akuzuar shtatë apo tetë udhëheqës të UÇK-së, ndërkaq që ka zyrtarë në pozita të rëndësishme në Serbi që kanë kryer krime dhe nuk kanë aktakuza…Për mua nuk është proces i barazpeshuar në kuptim të ndëshkimit dhe ndjekjes penale. Është lajm i keq për të gjithë qytetarët e Kosovës”, ka thënë Walker në RTK.

Ish-zëdhënësi i UÇK-së, Jakup Krasniqi mbrëmë u dërgua në paraburgimin e Dhomave të Specializuara. Për të njëjtin destinacion, me një avion ushtarak, sot u nisën edhe ish-bashkëpunëtorët e tij në luftë, ish-shefi politik i UÇK-së, Hashim Thaçi, ish-drejtori i shërbimit informativ të UÇK-së, Kadri Veseli dhe anëtari i Shtabit të Përgjithshëm të UÇK-së, Rexhep Selimi, pas aktakuzave ndaj tyre që u konfirmuan nga Gjykata Speciale./RTK