VV kërkon që ekspertiza e Astrit Deharit të publikohet sa më shpejt

Lëvizja Vetëvendosje ka kërkuar nga Prokuroria e Shtetit që sa më shpejt t’i dorëzohet familjes së Astrit Deharit, ekspertiza që është kryer në Zvicër e që ka mbërritur në Kosovë.

VV thotë se prej mediave janë informuar për arritjen e  raportit nga Lozana e Zvicrës në Kosovë.

“Edhe pse Prokuroria dhe Ministria e Drejtësisë duhet të kishin njoftuar opinionin publik me kohë për arritjen e këtij raporti, vetëm pas kërkesave të njëpasnjëshme të avokatit mbrojtës e përfaqësuesit ligjor i familjes si dhe kërkesave të familjes Dehari, më në fund sot u deklaruan për pranimin e raportit të lartëcekur”, thuhet në një komunikatë për media.

Ata kanë kërkuar nga Prokuroria që sa më parë t’i përgjigjet kërkesës duke ia dorëzuar Familjes Dehari dhe përfaqësuesit ligjor e avokatit mbrojtës të familjes Dehari, raportin në gjuhën origjinale. Si dhe ta publikojnë atë në versionin orgjinal dhe të përkthyer në gjuhën shqipe.

Sot, Prokuroria e Shtetit ka bërë të ditur se një zarf i Institutit Zviceran është pranuar nga ta për rastin e vdekjes së Astrit Deharit në qendrën e Paraburgimit në Prizren më 5 nëntor 2016.

Gjatë ditës së djeshme, ministri në detyrë i i Ministrisë së Drejtësisë, Ableard Tahiri ka reaguar për pretendimet e avokatit Tomë Gashi se Ministria që ai drejton e ka pranuar këtë raport.

Pretendimet e avokatit Tomë Gashit se kjo ekspertizë ka ardhur Tahiri i ka quajtur të pavërteta.