Vuçiq: Serbët e Kosovës vaksinohen me "sistem hibrid", të gatshëm t'u ndihmojmë edhe shqiptarëve

Serbia ka prezantuar sot një program masiv të vaksinimit.

Qendra për imunizim janë duke u hapur nëpër komuna në Serbi.

Presidenti i Serbisë, Aleksandër Vuçiq deklaroi se edhe serbët e Kosovës do marrin vaksinën përmes përdorimit të “sistemit hibrid”- i aplikueshëm në Kosovë dhe Serbinë qendrore, raporton Kossev.

Serbia do gjejë një mënyrë për të vaksinuar Serbët e Kosovës dhe është e gatshme të përkrah edhe shqiptarët sa më shumë që të mundet, tha Presidenti i Serbisë, Aleksandër Vuçiq gjatë ditës së sotme, pa dhënë detaje të mëtejshme.

“Njerëzit e zakonshëm nuk i kuptojnë rrugët që duhet të krijojmë dhe gjërat që duhet bërë. Duke u nisur nga fakti se ata (autoritetet e Kosovës) lëshuan një njoftim për kapjen dhe arrestimin e njerzëve tanë, ne në të njëjtën kohë mësuam këtë dhe i mbajtëm njerëzit tanë jashtë arrestimeve, ne larguam ilaçet, vaksinat dhe gjithçka në mënyrë që ata të mos mund t’i shkatërronin,” tha presidenti.

Duke folur për reagimin e ashpër nga Prishtina për dërgesat e vaksinave nga Serbia në veri të Kosovës dhe lansimin e programit të vaksnimit, ai theksoi se vendi ku janë ruajtur vaksinat u ndryshua për shkak të njoftimeve nga Prishtina se vaksinat mund të konfiskoheshin.

Vuçiq gjithashtu deklaroi se nëse vaksinat do kishin qenë në posedim të autoriteteve të Prishtinës, ato do ishin shkatërruar.

“Disa njerëz nga Kosova do të vaksinohen në Bujanovc dhe Vranjë. Ne do shohim se ku do i vaksinojmë njerëzit nga Shtërpca, Graçanica dhe vendet përreth,” shtoi ai, duke shtuar se një pjesë e selisë operacionale do punojë për këtë së bashku me Zyrën për Kosovën.

“Ne do kujdesemi për njerëzit tanë në Kosovë. Sigurisht, këtë do e bëjmë pa rrezikuar ndonjë dhe gjithmonë jemi të gatshëm të ndihmojmë shqiptarët dhe asgjë prej kësaj nuk do ndikohet nga përkatësia etnike.Ashtu si është Kosova e pavarur për ta, edhe për ne Kosova është pjesë e Serbisë,” shtoi Vuçiq.