Vritet një person në afërsi të Lipjanit, arrestohen dy persona
Mëngjesin e sotëm një burrë është vrarë me armë zjarri rreth orës 07:30 afër ish- QMI-së. I njëjti nuk ka arritur që t’i mbijetoj plagëve të marra nga arma e zjarrit.
Lidhur me këtë ngjarje policia ka arrestuar dy persona të dyshuar dhe ka konfiskuar një armë që dyshohet të jetë përdorur në rast.
Lajmin për KALLXO.com e ka konfirmuar Zëdhënësja e Policisë së Rajonit të Prishtinës, Florie Ahmeti- Haziraj.
Sipas Ahmetit policia ka marrë informacionin për një plagosje me armë zjarri në rrugën Prishtinë -Ferizaj.
“Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore, të mbështetura edhe nga njësiti rajonal për hetimin e krimeve si dhe njësitë e tjera për ekzaminim të vendngjarjes”, tha Ahmeti për KALLXO.com.
Ajo shtoi se me të dalë në vendin e ngjarjes policia ka konstatuar se ka të bëjë me plagosje nga arma e zjarrit ku është plagosur viktima A.S, i cili duke mos mundur t’i përballojë plagëve të mara nga arma e zjarrit ka vdekur.
“Vdekjen e viktimës e ka konstatuar ekipi mjekësor në QKUK”, tha Ahmeti tutje.
Aktualisht hetuesit policorë, janë duke punuar për të ndriçuar dhe sqaruar të gjitha rrethanat që kanë të bëjnë me rastin, i cili nga ana e Prokurorit të shtetit është cilësuar si vrasje e rëndë.