Vritet një grua në Ferizaj - Lajm në zhvillim
17:00 – Policia: Gruaja e vrarë në Ferizaj, 21-vjeçare
Gruaja e vrarë të premten pasdite në Ferizaj, (12.04.2024) nga i dyshuari ish-bashkëshorti i saj ishte 21-vjeçare me inicialet E.C., ka konfirmuar Policia e Kosovës.
Policia më tej ka konfirmuar se i dyshuari me inicialet V.A është 36-vjeçar dhe vrasja ka ndodhur në katin e parë, brenda Qendrës për Punë Sociale në Ferizaj.
KALLXO.com mëson se gruaja e vrarë është Erona Cokli, ndërsa i dyshuari Valon Aliu.
16:27 – Vrasja e gruas në Ferizaj, Instituti i Mjekësisë Ligjore shkon në vendin e ngjarjes
KALLXO.com sjell pamjet direkt nga Ferizaj.
15:46 – Vrasja në Ferizaj, është plagosur edhe vëllai i mitur i viktimës
Vëllai i gruas që u vra në Ferizaj i lindur në vitin 2009 është plagosur në dorë dhe është jashtë rrezikut për jetën.
Kështu konfirmoi për KALLXO.com, ushtruesi i detyrës së drejtorit të Spitalit të Ferizajt, Fikret Arifi.“Në spital ka ardhë vëllai i të ndjerës. I është dhënë ndihma e parë, është jashtë rrezikut për jetë se plumbi në parakahraun e djathtë, në dorë domethënë. I është largu plumbi, i është mobilizuar dora. Po planifikohet dërgimi i tij në Repartin e Ortopedisë në Ferizaj” – tha Arifi.
15:35 – Arrestohet burri që dyshohet se vrau ish-gruan e tij
V.A. është arrestuar pas ngjarjes së rëndë qe u regjistrua në orët e pasdites së sotme.
Një grua u vra me armë zjarri, ndërsa dyshimet e prokurorisë janë se autori i vrasjes është ish-bashkëshorti.
Këtë e ka konfirmuar për KALLXO.com edhe kryeprokurori i Prokurorisë Themelore në Ferizaj, Shukri Jashari.
“Sipas informatave që kam pranuar nga Policia e Kosovës, i dyshuari është arrestuar”- tha Jashari për KALLXO.com
15:27 – Vrasja në Ferizaj, Prokuroria: I dyshuari është ish-bashkëshorti i viktimës
Prokuroria Themelore në Ferizaj ka konfirmuar se një grua është vrarë në Ferizaj.
Dyshimet e prokurorisë janë se autori i vrasjes është ish-bashkëshorti i viktimës.
“Po mund të ju konfirmojmë që një grua është vrarë në Ferizaj. Sapo bisedova edhe me prokurorin kujdestar, ai më njoftoi se dyshimet e para janë se një grua është vrarë nga bashkëshorti. Dyshohet se ngjarja ka ndodhur në Qendrën për Punë Sociale” – ka thënë zëdhënësja e Prokurorisë Themelore të Ferizajt, Vjosa Baftiu.
Zëdhënësja e Prokurorisë iu ka referuar të dyshuarit si bashkëshorti i viktimës, ndërsa kryeprokurori Shukri Jashari si ish-bashkëshort.
15:22 – Vrasja dyshohet se ndodhi para objektit të Qendrës për Punë Sociale
Drejtoresha e Qendrës Sociale, Adelina Rexhepi e pyetur se a ka ndodhur vrasja para objektit të Qendrës për Punë Sociale, është përgjigjur me “po, ka ndodhë”.
“Momentalisht jam me Policinë, ka ndodhë, por nuk muj me dhanë asnjë informatë.” E pyetur se a ka ndodhur rasti “tek objekti juaj”, ajo është përgjigjur me “po”.
Një grua është vrarë në Ferizaj, të premten më 12.04.2024.
Lajmin e ka konfirmuar për KALLXO.com, zëdhënësi i Policisë Rajonale të Ferizajt, Kanun Veseli.
Informatat në Policinë e Kosovës janë që deri më tani një grua është pranuar në Qendrën Emergjente të Spitalit të Ferizajt pa shenje jete.
KALLXO.com do të ju mbajë të informuar.
15:22 – Vrasja dyshohet se ndodhi para objketit të Qendrës për Punë Sociale
Drejtoresha e Qendrës për Punë Sociale në Ferizaj, Adelina Rexhepi e ka konfirmuar për KALLXO.com se vrasja ka ndodhur para objektit të këtij institucionit.
Artikulli në përditësim.
Shënim: Artikulli është edituar më 12.04.2024, ora 15:41. Zëdhënësja e Prokurorisë iu ka referuar të dyshuarit si bashkëshorti i viktimës, ndërsa kryeprokurori Shukri Jashari si ish-bashkëshort. Kallxo.com ka edituar artikullin dhe të dyshuarit iu është referuar si ish-bashkëshort i viktimës.
Shënim: Artikulli është edituar më 16.04.2024, në ora 17:41, duke u zëvendësuar fjalia “Drejtoresha e Qendrës për Punë Sociale në Ferizaj, Adelina Rexhepi e ka konfirmuar për KALLXO.com se vrasja ka ndodhur para objektit të këtij institucionit”, për t’u zëvendësuar duke iu saktësuar citati drejtoreshës së qendrës që e ka dhënë deklaratën përmes telefonit, për KALLXO.com, përfshirë edhe pyetjet e gazetares.