Vrasja në të cilën dyshohet se u përfshi një polic, suspendohet shefi i ndërrimit në Ferizaj

Shefi i ndërrimit të policisë në Ferizaj është suspenduar nga detyra pas ngjarjes tragjike që u shënua në Bibaj të Ferizajt mbrëmjen e 16.08.2024.

Ndonëse jo i përfshirë në rast, suspendimi erdhi pasi i njëjti nuk ka menaxhuar mirë zyrtarët policorë të tij.

Në lidhje me këtë cështje KALLXO.com ka kontaktuar me Zëvendësdrejtorin rajonal të Policisë në Ferizaj, Qazim Reka i cili konfirmoi rastin.

Masa e suspendimit të shefit të ndërrimit nuk u bë nga Inspektorati Policor i Kosovës por nga Policia vet.

Kjo si masë preventive për ngjarje të tjera.

“Po mund të ju konfirmoj që kjo ka ndodhur. Është masë e cila është ndërmarrë nga policia, është masë preventive nuk është masë se zyrtari ka marrë pjesë në rast. E kemi vlerësuar se i njëjti nuk ka monitoruar policët që ka pasur dhe kjo është kështu”- tha Reka.

Pas arrestimit në lidhje me vrasjen e S.Sadriut në Bibaj të Ferizajt, zyrtari policor F.Ramadani dhe një person tjetër për të cilin KALLXO.com mëson se është i afërm i policit, nuk janë deklaruar para hetuesve të Inspektoratit Policor dhe prokurorisë, pra janë mbrojtur në heshtje.

KALLXO.com mëson se ende nuk janë të qarta arsyet që shtyen vrasjen që ndodhi në parkingun e një salle dasmash në Bibaj të Ferizajt ndërsa janë ëprmendur disa ‘motive të ulëta’.

Sic mëson KALLXO.com janë shikuar kamerat e sigurisë që kanë qenë të vendosura në perimetrin ku ka ndodhur vrasja dhe është identifikuar se përvec zyrtarit policor që dyshohet se me armë zyrtare gjuajti në drejtim të S.Sadriut, edhe një person tjetër me një veturë tjetër ishte në vendin e ngjarjes.

Ky pasi ishte identifikuar është arrestuar dhe është dërguar në stacion për intervistim. Edhe për këtë person që është i afërm i policit, është caktuar masa e sigurisë për 48 orë.

Edhe polici edhe familjari i tij kanë shkuar në vendin e ngjarjes me dy vetura. Në pamjet që tashmë ka në dorë policia dhe prokuroria shihen të dy të dyshuarit duke dalë nga veturat e tyre.

Nga burime brenda prokurorisë, KALLXO.com mëson se i dyshuari i dytë fillimisht do të trajtohet për veprën penale në bashkëkryerje e më pas në bazë të zbardhjes së rastit do të shqyrtohet edhe cilësimi apo ricilësimi i veprës penale.

Polici sic mëson KALLXO.com armën e gjatë e kishte me vete, armë kjo me të cilën janë pajisur muajt e fundit policët e Kosovës. Ndonëse vrasjen dyshohet se e kreu në cilësi të personit civil pra me rroba e veturë civile por që përdori armën zyrtare të punës.

Vrasja në Ferizaj, Reka: Polici ishte jashtë detyrës zyrtare, vrasja u krye me armë zyrtare