Vrasja në Ferizaj, Reka: Polici ishte jashtë detyrës zyrtare, vrasja u krye me armë zyrtare

Një rast tragjik ka ndodhur sonte, më 16.08.2024, në fshatin Bibaj të Ferizajt.

Një person është vrarë me armë zjarri në oborrin e një salle dasmash.

Dorasi dyshohet se është një pjesëtar i Policisë së Kosovës.

Zëvendësdrejtori i Policisë së Rajonit të Ferizajt, Qazim Reka, tha se polici që dyshohet se e kreu vrasjen ishte jashtë detyrës zyrtare.

“Ai ishte jashtë detyrës zyrtare, ishte me rroba civile dhe me veturë civile” – tha Reka në një konferencë për media të premten vonë.

Megjithatë, zëvendësdrejtori Reka tha se vrasja është kryer me armën zyrtare.

“Po, vrasja është kryer me armë zyrtare, armë e gjatë“ – tha ai.

Rasti tragjik ka ndodhur rreth orës 19:30 në oborrin e një salle dasmash.

Sipas Rekës, polici i dyshuar nuk ishte pjesë e dasmës.

Viktima, siç mëson KALLXO.com është S. Sadriu.

Ndërsa, polici i dyshuar është F.R.

Prokuroria e Ferizajt ka njoftuar se me vendim të Prokurorit të Shtetit i dyshuari për vrasjen në Bibaj është ndaluar për 48 orë.