Vrasja e të riut në Prishtinë, arrestohen katër persona
Policia e Kosovës ka arrestuar katër persona në lidhje me vrasjen e cila ka ndodhur gjatë ditës së djeshme në Prishtinë.
Lajmin për KALLXO.com e ka konfirmuar Zëdhënësja e Policisë së Rajonit të Prishtinës, Florie Ahmeti- Haziraj.
Ahmeti- Haziraj shtoi se dy nga të dyshuarit, dyshohet se kanë kryer vrasjen ndërsa dy të tjerë janë ngarkuar me veprën për dhënien e ndihmës për kryerjen e vrasjes.
“Drejtoria Rajonale e Policisë në Prishtinë, respektivisht njesiti për Hetime të Përgjithshme , ka realizuar një operacion që ka rezultuar me arrestimin e katër personave të dyshuar për rastin e vrasjes së rëndë që ka ndodhur dje në Prishtinë. Të dyshuarit janë E. I., mashkull, 19 vjeç, shtetas i Republikës së Kosovës dhe E. M., mashkull, 19 vjeç, shtetas i Republikës së Kosovës, dyshohet të kenë kryer veprën vrasje e rëndë, ndërsa, P. I., mashkull, 18 vjeç, shtetas i Republikës së Kosovës dhe L. B., mashkull, 20 vjeç, shtetas i Republikës së Kosovës, ngarkohen me veprën, dhënie e ndihmës kryerësve pas kryerjes së veprës penale’’, tha Ahmeti për KALLXO.com.
Sipas Ahmetit, të dyshuarit janë intervistuar nga ana e hetuesve të Njësisë së Hetimeve të Përgjithshme dhe pas intervistimit me aktvendim te prokurorit jane dërguar në qendrën e mbajtjes.
Njesiti i hetimeve ka arrite te gjejë dhe sekuestroj një armë, një skuter dhe disa prova të tjera që mund të shërbejnë në dokumentimin e rastit.
KALLXO.com raportoi se 17 vjeçari që u plagos dje në lagjen “Arbëria” pas të shtënave me armë, ka vdekur sot në Qendrën Klinike Universitare të Kosovës.
Një i plagosur nga të shtënat me armë zjarri në lagjen Arbëria