Vrasja e Liridona Ademajt, Shaban Murseli: Nuk e kam kontaktuar Naimin, s'kam angazhuar ndonjë avokat për të

Shaban Murseli, babai i Naim Murselit (i cili dyshohet se e ka organizuar vrasjen e gruas së tij, Liridona Ademajt), ka thënë se nuk e ka kontaktuar Naimin dhe se nuk ka angazhuar ndonjë avokat për të.

Ai është shprehur i tronditur nga ngjarja.

Sa i përket pjesëmarrjes në rivarrimin e Liridonës, Shaban Murseli thotë se ndonëse kishte dëshirë të merrte pjesë nuk është lejuar nga familja Ademaj.

“Intervista ime është keqkuptuar. Për Naimin as nuk kam caktuar avokat, sepse jam i tronditur, nuk e kam kontaktuar. Kam folur për ditën e varrimit, ua shkrova dje një mesazh, kisha dëshirë që të merrja pjesë në rivarrim se e kam pasur si vajzën time por mora përgjigje negative. Ata ma kthyen: “Miqësia jonë ka përfunduar”. Ende s’po mundem t’i besoj syve të mi e veshëve të mi”, tha ai në RTV Dukagjini.

Teksa ka rrëfyer në emisionin “Debat Plus”, në RTV Dukagjini, babai i Naim Murselit ka folur edhe mbi lajmet që kanë qarkulluar se Naimi ka pasur probleme psikike.

Këtë ai e mohon duke thënë se Naimi ka pasur një defekt në zemër dhe jo diçka të atillë.

“Gjendja jonë edhe emocionale edhe fizike është në gjendje të mjerueshme. E ndjera ka dy fëmijë që po përkujdesemi ne për ta, është shumë e rëndë. Ende po presim që në prani të psikologëve kur kthehen në Suedi t’u tregojmë për vdekjen. Naimi ka lindur me një defekt në zemër, vetëm dy muajsh në Zagreb e ka bërë një operacion dhe kjo ka qenë arsyeja pse kemi shkuar në Suedi”.

Naimin, babai i tij e përshkruan si një fëmijë të hareshëm dhe të buzëqeshur..

“Ka qenë fëmijë i hareshëm, i buzëqeshur. Naimi s’ka qenë në gjendje një flutur ta mbysë. 13 vjet s’kanë pasur. Kurrë në jetën tonë nuk kemi parë që kanë problem, as nuk na kanë thënë, kanë qenë çifti më i lumtur që mund të ekzistojë. Pyeta se ku është Naimi, më thanë e kanë thirr prokuroria në pyetje. Naimi erdhi 30 minuta pas kufomës. Është vonuar në prokurori deri i kanë pyetur fëmijët. Kur na kanë thirr ta bëjmë përshëndetjen e fundit me Liridonën, e kam takuar Naimin por vetëm i kam shprehur ngushëllime… u bë varrimi. Pasi e varrosëm e kam dhënë një intervistë që më është keqpërdorur shumë, sepse s’kisha asnjë informacion vetëm ato që i kisha dëgjuar. “Unë ika, Liridonën e vranë”, më kishte thënë Naimi”, tha Shaban Murseli. /RTV Dukagjini