Vonesat me Udhërrëfyesin për energjinë, deklarohen nga Bashkimi Evropian

Ndonëse kanë kaluar 107 me vetëm një pikë të zbatuar, Bashkimi Evropian edhe një herë ka thënë se vonesat për zbatimin e Udhërrëfyesit për energjinë mes Kosovës dhe Serbisë kanë ndodhur për shkak të aspekteve teknike, por pa dhënë detaje se cilat janë ato.

“Vonesat në zbatimin e Udhërrëfyesit janë për shkak të aspekteve teknike, të cilat BE-ja u ka kërkuar palëve t’i adresojnë pa vonesë. BE-ja po ofron udhëzime se si të adresohen pyetjet e hapura” – ka thënë për KALLXO.com, Peter Stano, Zëdhënësi kryesor për Punët e Jashtme dhe Politikën e Sigurisë.

Stano po ashtu ka theksuar se BE-ja po ndjek nga afër aktivitetet e të dyja palëve në Udhërrëfyesin e energjisë në kapacitetin e saj si lehtësues dhe garantues i marrëveshjeve të dialogut.

“KOSTT, KEDS dhe Elektrosever janë në komunikim të rregullt. Ata gjithashtu raportojnë rregullisht në BE dhe SHBA. BE-ja po lehtëson dialogun ndërmjet palëve; nuk është arbitër. Përgjegjësia përfundimtare për zbatimin e suksesshëm të marrëveshjeve të energjisë dhe Udhërrëfyesit i takon palëve” – ka thënë ai.

Zëdhënësi i BE-së po ashtu ka thënë se janë duke punuar për t’i kapërcyer vonesat që kanë ndodhur me Udhërrëfyesin.

“Ne po punojmë me të gjitha palët e përfshira për të gjetur një mënyrë përpara për të kapërcyer vonesën aktuale në zbatim” – ka thënë tutje ai.

Kalendari për udhërrëfyesin për zbatimin e marrëveshjes për energjinë është 100-ditor. Por edhe pse kanë kaluar 107 ditë që nga nënshkrimi i saj më 21 qershor në Bruksel, ende vetëm një pikë e këtij kalendari është zbatuar nga palët.

Pika e vetme e zbatuar deri më tani, edhe pse tashmë kanë kaluar 100 ditë, është ajo për dhënien e licencës së operimit nga Zyra e Rregullatorit të Energjisë (ZRRE) për kompaninë ‘Elektrosever’.

Mirëpo kjo licencë pritet të shqyrtohet nga ZRRE në 10 ditët në vijim, pasi që pikën 8-të të udhërrëfyesit parashihet që “ZRRE mund të vendosë të pezullojë dhe/ose të tërheqë licencën për furnizim dhënë Elektroseverit, subjekt i konsultimeve paraprake ndërmjet palëve, të lehtësuar nga BE, gjatë një periudhe maksimale prej 15 ditësh. BE-ja do të japë një opinion, nëse kërkohet nga të paktën njëra nga palët”.

Nga ZRRE-ja kanë konfirmuar për KALLXO.com se janë duke shqyrtuar mundësitë për revokim të licencës për kompaninë ‘Elektrosever’.

Udhërrëfyesi për energjinë, 106 ditë pa zbatim të tij