DVP Vlorë

Vlorë, shkatërrohet grupi që shiste mina me telekomandë (VIDEO)

Policia në Vlorë në bashkëpunim me Prokurorinë në operacionin e koduar si ‘Knockout’ ka arrestuar dy persona që tentuan të shisnin mina me telekomandë për 10 mijë euro.

Policia bën të ditur se për operacionin është kryer hetim disajavor.

“Finalizohet si rezultat i një hetimi disajavor, të ndjekur me metoda proaktive, operacioni policor i koduar “Knockout”, për goditjen e veprimtarisë kriminale në fushën e prodhimit, shitjes dhe trafikimit të minave me telekomandë, që ka si synim krimet kundër personit dhe pronës. Tentuan të shisnin mina me telekomandë, për llogari të një grupi kriminal, kundrejt çmimit 10 000 euro, lokalizohen dhe vihen në pranga 2 shtetas, në qytetin e Vlorës”- thuhet në njoftim.

Personat e arrestuar janë B. U., 31-vjeç dhe A.Q., 21-vjeç, të dy lindur në Pukë dhe banues në Tiranë, për veprën penale – mbajtja pa leje dhe prodhimi i armëve, armëve shpërthyese dhe municionit.

Sipas Policisë së Shtetit, janë sekuestruar 3 mina të montuara me lëndë të dyshuar eksplozive plastike C4, të lidhura me aparat celular, për t’u komanduar në distancë.

“Pas lokalizimit dhe prangosjes së këtyre shtetasve, në një lokal, në lagjen “28 Nëntori”, shërbimet e Policisë, gjatë kontrollit fizik ndaj tyre, i gjetën 3 mina me telekomandë, të montuara me lëndë të dyshuar eksplozive plastike C4, të lidhura me aparat celular, për t’u komanduar në distancë”- thuhet më tej nga Policia.

Derisa, nga veprimet hetimore dyshohet se këta shtetas, në bashkëpunim me njëri-tjetrin, do t’i shisin minat, për llogari të një grupi kriminal, kundrejt çmimit 10 mijë euro.

Policia e Shtetit thekson se po vijojnë hetimet për dokumentimin e plotë të kësaj veprimtarie kriminale dhe për vënien para përgjegjësisë ligjore të personave të tjerë të përfshirë. Kurse, materialet i kanë kaluar Prokurorisë pranë Gjykatës së Rrethit Gjyqësor Vlorë, për veprime të mëtejshme.