Vjosa Osmani: Viktimat nga COVID-19 - rezultat i neglizhencës 20-vjeçare në shëndetësi

Kryetarja e Kuvendit të Kosovës, Vjosa Osmani, ka reaguar pas rritjes së numrit të viktimave nga COVID-19.

Osmani ka thënë se COVID-19 ka shtruar nevojën urgjente të qeverive për ta rritur gatishmërinë në menaxhimin e situatës.

Gjithashtu ajo ka thënë se viktimat nga COVID-19 janë si pasojë e neglizhencës 20 vjeçare ndaj sistemit të shëndetësisë, i cili, sipas saj, është konsideruar prioritar por nuk është trajtuar si i tillë në praktikë.

Osmani ka kërkuar që të respektohen masat të cilat janë vendosur për të parandaluar përhapjen dhe infektimin me coronavirus.

Më poshtë mund të lexoni postimin e plotë të Vjosa Osmanit:

Sot u shënua shifra e dhimbshme prej 300 jetësh të humbura; 300 ëndrra njerëzish u fikën në betejën kundër COVID-19. Prapa secilit nga këta numra qëndron një histori e trishtë, zbrazëtia e pafund që e lanë në shpirtrat e të dashurve, që nuk mund të plotësohet asnjëherë!

Por, dhimbja jonë mund të rritet ditë pas dite, e shifrat si këto të trokasin në ndërgjegjen tonë. Prandaj sot, kur nuk dimë si do të duket epilogu i këtij kapitulli të hidhur, duhet të mësojmë nga historia e secilit, të mbajmë distancë për hir të tyre, të vendosim maska mbrojtëse dhe ta ruajmë higjienën personale!

Ta pranojmë sintagmën “një herë në shekull”, dhe ta mposhtim pandeminë me kurajo e kujdes ndaj njëri-tjetrit. Të përmbahemi atëherë kur dielli na provokon e natyra na thërret.

Të mbajmë distancën fizike edhe atëherë kur të na mungojnë përqafimet e më të dashurve tonë. Ne duhet të jemi mburojë e sistemit shëndetësor duke ushtruar kujdes personal, për hirë të sakrificës së profesionistëve, të cilët me vetëmohim të pashoq po përballen me rrezikun e çdoditshëm!

Përkundër trendit alarmant, qeveria refuzoi trajtimin e ligjit anti-covid duke e konsideruar të panevojshëm, refuzoi buxhet për maska mbrojtëse dhe vaksina, ankohet se nuk ka mjaftueshëm shtretër përderisa prioritizon investime jo të domosdoshme infrastrukturore apo pagesa për fatura për avokatët e Gjykatës Speciale.

Të mos harrojmë, viktimat janë rezultat edhe i neglizhencës 20 vjeçare ndaj sistemit shëndetësor të brishtë, i cili megjithëse është konsideruar prioritar në letër, në praktikë nuk po trajtohet si i tillë.

COVID-19 është kudo përreth nesh. Sot kemi nevojë të mobilizohemi me një zë që ta zvogëlojmë dhimbjen, t’i zvogëlojmë vuajtjet dhe ta rrisim shpresën!