Viti kur Kosova regjistroi temperaturat më të ulëta
Nga fillimi i kësaj jave Kosova dhe vendet e rajonit janë përfshirë prej temperaturave të ulëta.
Sipas të dhënave nga Instituti Hidrometeorologjik i Kosovës, gjatë ditës së djeshme temperatura më e ulët ishte -9 gradë celsius, derisa sot temperatura më e ulët u regjistrua në Kamenicë deri në -16.7 gradë celsius, pasuar nga Ferizaj me -16 gradë.
Derisa, në Prishtinë temperatura për sot shkoi në -13 gradë celsius.
Kështu ka bërë të ditur për KALLXO.com Besim Aliu nga Instituti Hidrometeorologjik i Kosovës.
Aliu shtoi se, temperatura më e ulët në Kosovë u regjistrua në janar të vitit 2006.
“Nga të dhënat që kemi prej periudhës së pasluftës, temperatura më e ulët është regjistruar në janar të vitit 2006, ku kishte shkuar në -25 gradë celsius, madje me kohëzgjatje për disa ditë.
Aliu shtoi se ka disa spekulime se në vitin 1986 në qytetin e Gjilanit është regjistruar temperatura -32 gradë celsius, por që nuk mund ta faktojnë.
“Ka pas edhe shumë spekulime se në Gjilan gjatë vitit 1986 është regjistruar temperatura -32 gradë celsius, por ne si institut nuk kemi të dhëna për ta faktuar”, shtoi tutje Aliu.