Arkiv - Vërshimet në Vushtrri - Janar 2021 - Foto: KALLXO.com
VIDEO: Vërshimet në Vushtrri, qytetarët nuk u ndihmuan as nga Komuna as nga Qeveria
Vushtrria është njëra ndër komunat më të prekura nga vërshimet e janarit dhe shkurtit të këtij viti.
Vlera e dëmeve në ekonomitë familjare në qytet dhe në fshatra sipas autoriteteve lokale është qindra mijëra euro.
Dëme të mëdha i janë shkaktuar në shtëpi edhe vushtrriases Kada Muçiqi, e cila jeton afër lumit Silnica.
“Me laminat, me makinë të enëve, shporet, tavolinat e këto krejt të lagëta. Frigoriferi, frizi, fshirësja, se këto kanë qenë në ujë. U dashtë me i hek krejt laminatin me u ter, jena mundu me ter më një nxemëse që me mujtë me hi sa për pak. Tash po duhet në dorë me i la teshat”, tha ajo për KALLXO.com.
Kada Muçiqi thotë se nuk është ndihmuar ende as nga Komuna as nga niveli qendror.
Dëme të mëdha nga vërshimet i janë shkaktuar edhe Raif Latifit, banor i fshatit Dumnicë e Epërme.
Ai po vlerëson se dëmet kapin shumën 12 mijë euro.
Edhe Raif Latifi ankohet se nuk është ndihmuar nga Komuna e Vushtrrisë as nga institucionet qeveritare.
Për ditën e vërshimeve thotë se brenga më e madhe ka qenë si t’i shpëtojë nipat e mbesat.
“Gjithçka aty po ndodhke brenda 1-2 ore, kur po të hyke uji. Po krejt frikën e kishim me i shpëtu fëmijët se me pas qenë krejt natë, nuk e di çka kishim bo, se edhe pa rrymë. Janë kanë krejt pos i kanë këqyr vlerësimin çka kanë bo komuna ni “kauq” nuk e ka pagu. Me kon jon kon”, tha Latifi për KALLXO.com
Komuna e Vushtrrisë një një përgjigje për KALLXO.com ka thënë se vlera e dëmeve nga vërshimet në këtë vit është mbi 600 mijë euro.
Agron Përquku, drejtor i Inspektoratit në Vushtrri, ka thënë se kompensimi pritet të bëhet nga niveli qendror dhe jo nga Komuna.
“ Sa i përket çështjeve të vlerësimeve dhe kompensimit, kryeministri Avdullah Hoti në ditët e vërshimeve kishte qenë në vendin e ngjarjes dhe u ka premtuar të gjithë atyre që kanë qenë të përfshirë nga vërshimet se do t’i ndalin në ndihmë. Ne si Komunë kemi formuar komisione dhe e kemi bërë vlerësimin e dëmeve tek ekonomitë familjare dhe ekonomitë në bujqësi. Sa u përket ekonomive familjare i kemi proceduar 135 familje me rreth 514 mijë euro dëme, të cilat i kemi proceduar në nivel qendror”, tha Përquku.