VIDEO - Rama viziton punimet te tuneli në ‘Kurriz’: Projekti do të përfundojë brenda tetë muajve
Kryetari i Komunës së Prishtinës, Përparim Rama i shoqëruar nga drejtoresha për Kulturë, Sibel Halimi kanë vizituar punimet e renovimit të tunelit të “Kurrizit” në lagjen “Dardania” më 22.10.2024.
Kryetari Rama tha se punimet do të përfundojnë brenda tetë muajve.
“E kemi filluar një projekt madhor, i cili tash e që 45 vite nuk është punuar, ky është projekt interesant që bën transformimin e tunelit tek kurrizi. Punimet e mëdha janë duke u kryer, tek tuneli prej një gjatësie 280 metra, projekt ky me vlerë prej 1.3 milion euro dhe pritet të përfundojë brenda tetë muaj”- theksoi ai.
Ai dha detaje tjera rreth projektit.
“Kjo pjesë do të transformohet dhe do të jetë funksionale për shumë gjëra të tjera, ka me qenë një arterie për makina, për biçikleta do të ketë edhe transporte alternative, për më shumë se 60 mijë banorë që jetojnë në lagjen ‘Dardania’”- potencoi Rama.
KALLXO.com ka raportuar edhe më 02.09.2024, që Komuna e Prishtinës ka nënshkruara një kontratë në vlerë prej 1.2 milionë euro për “renovim artistik dhe infrastrukturor” të tunelit të kurrizit në lagjen Dardania.
Operatori që do të kryejë punimet në tunel është “EING COM SH.P.K”.
