Nxënësit në Pejë publikojnë video në ‘TikTok’ duke dëmtuar karriget në klasë
VIDEO - Nxënësit në Pejë publikojnë video në ‘TikTok’ duke dëmtuar karriget në klasë
Disa nxënës të shkollës teknike “Shaban Spahija” në Pejë, kanë postuar video në rrjetin social “TikTok” duke dëmtuar karriget në klasë.
KALLXO.com ka siguruar videon e këtyre tre nxënësve të cilët shihen duke hedhur karriget.
Në lidhje me këtë rast, drejtori i Arsimit në Pejë, Naser Gega tha për KALLXO.com se kjo ngjarje vërehet se ka ndodhur më herët.
“Po, dje jam informuar për rastin. Ngjarja vërehet se ka ndodhur më herët, por shkolla nuk ka pasur njohuri”, tha Gega.
Drejtori u shpreh se këta nxënës janë ende duke vijuar mësimet në këtë shkollë.
“Pas rastit fillojnë procedurat nga ana e shkollës me marrjen e deklaratës, thirrja e prindërve dhe njoftimi i tyre për rastin dhe masa më e lehtë do të jetë largimi nga shkolla”, tha më tutje drejtori.
Ky nuk është rasti i vetëm që nxënësit publikojnë video duke dëmtuar pajisje shkollore.
Në janar të këtij viti ishte publikuar një video ku shihen disa nxënës të Shkollës e Mesme të Lartë “Haxhi Zeka” në Istog duke e dëmtuar inventarin brenda një klase.
