Vdes edhe i lënduari i dytë nga aksidenti rrugor në Zhur të Prizrenit
Policia e Kosovës ka njoftuar se ka vdekur një person i cili ishte aksidentuar më 12 korrik në fshatin Zhur të Preizrenit dhe që po trajtohej në Qendrën Klinike Universitare të Kosovës.
Sipas policisë personi i vdekur është viktima e dytë e këtij aksidenti.
“Lidhur me rastin, nga QKUK është raportuar se edhe vozitësi mashkull kosovar ka vdekur. Viktima e dytë e këtij aksidenti. Me vendim të prokurorit, trupi i pa jetë i viktimës është dërguar në IML për obduksion”, thuhet në raportin e policisë.
Shaqir Bytyqi, zëdhënësi i policisë në Prizren, e ka konfirmuar për KALLXO.com, se bëhet fjalë për aksidentin i cili kishte ndodhur mes një kamioni dhe një veture, për të cilin është raportuar në media më 12 korrik.
Në ditën kur kishte ndodhur aksidenti kishte vdekur një person dhe dy të lënduar.
