Vdekja e 50 vjeçarit në Prishtinë, prokuroria në vendin e ngjarjes

Një 50 vjeçar është gjetur i vdekur në një veturë në lagjen Emshir në Prishtinë.

Lajmin për KALLXO.com e ka konfirmuar zëdhënësi i Policisë së Kosovës për rajonin e Prishtinës, Agron Borovci.

KALLXO.com ka kontaktuar edhe me prokuroren e rastit, Besa Limani.

Ajo ka treguar se për momentin janë në vendngjarje.

Në anën tjetër, sipas Borovcit trupi i viktimës është gjetur rreth orës 12:00.

“Rreth orës 12:00, kemi pranuar informatën për një trup të pajetë, në një veturë në lagjen “Emshir” në Prishtinë. Policia menjëherë ka dalë në vendin e ngjarjes si dhe mjekët të cilët kanë konstatuar vdekjen e viktimës, rreth 50 vjeç”, ka thënë Borovci për KALLXO.com.

Tutje ai ka shtuar se dyshohet se ka elemente që sugjerojnë për vetëvrasje.

“Mbështetur në informacionet e para, përkundër që ka elemente që sugjerojnë për vetëvrasje, policia në koordinim me prokurorin e shtetit ka nisur një hetim mbi vdekjen dhe po vijon me ndërmarrjen e të gjitha veprimeve hetimore dhe të ekzaminimit, që do të ndihmonin hetimin e ngjarjes si dhe sqarimin e plotë të rastit”, ka shtuar Borovci.