Valbon Krasniqi rezulton pozitiv me COVID-19
Ushtruesi i detyrës së drejtorit të përgjithshëm i ShSKUK-së, Valbon Krasniqi, është infektuar me sëmundjen COVID-19.
Ka qenë vet Krasniqi që ka njoftuar përmes një postimi në rrjete sociale.
“Qytetarë të nderuar, sot edhe unë rezultova pozitiv me COVID-19. Ditët në vijim do të jem në vetizolim duke respektuar të gjitha rekomandimet. Apeloj te të gjithë për kujdes maksimal. Ju lutem kujdes virusi ekziston!”, shkroi Krasniqi.
Qeveria e Kosovës ka marrë sot masa të reja kundër COVID-19.
Krahas vendimit të Qeverisë së Republikës së Kosovës për masat e veçanta kundër COVID-19, ministri i Shëndetësisë, Armend Zemaj ka marrë vendim edhe për karantim të 7 komunave të Kosovës gjatë fundjavës.
Përmes këtij vendimi, ndalohet hyrja/dalja e qytetarëve dhe automjeteve private prej orës 20:00 të ditës së sotme deri në orën 05:00 të ditës së hënë, në Komunën e Prishtinës, Fushë Kosovës, Gjilanit, Obiliqit, Gjakovës, Podujevës dhe Shtimes.
Kjo vlen për të gjithë, përveç:
1.1. Personelit shëndetësor dhe personelit të sigurisë;
1.2. qytetarëve për nevoja mjekësore, prodhim, furnizim, dhe shitje të mallrave esenciale ushqim, barna për njerëz dhe kafshë e shpezë);
1.3. operatorëve ekonomik dhe transpoti i lirë i mallrave/shërbimeve për të siguruar funksionimin e zingjirit të furnizimit;
1.4. kompanitë ndërtimore dhe operatorët që kryejnë punë publike;
Përmes këtij vendimi obligohet Policia e Kosovës në çdo hyrje/dalje të bëjë kontroll rigoroz për parandalimin e përhapjes së infeksionit me COVID-19.
Për të gjithë shkelësit e këtyre masave, organet kompetente obligohen të shqiptojnë masat ndëshkimore komfor Ligjit për parandalimin dhe luftimin e pandemisë covid-19 në territorin e Republikës së Kosovës.
Vendimi hyn në fuqi ditën e sotme.
“Çdo komunë tjetër që hynë në zonë në të kuqe të infeksionit për kokë banori (sipas hartës), do të ketë masë të njejtë”, theksohet në vendimin e Qeverisë.Sot në Kosovë janë regjistruar 732 raste të reja me COVID-19 në Kosovë, prej tyre 316 në Prishtinë.
