Universiteti i Prishtinës i bindet ministrit në largim, rrit numrin e studentëve të Mjekësisë
Fakulteti i Mjekësisë në Universitetin “Hasan Prishtina” nga ky vit do të ketë numër më të madh të studentëve.
Kjo pasi Universiteti i Prishtinës, sot ka marrë vendim që numri i studentëve në programin “Mjekësi e Përgjithshme” dhe “Infermieri”, të rritet për disa studentë.
Sipas njoftimit të UP, në programin “Mjekësi e Përgjithshme” numri nuk mund të kalojë 225 studentë, ndërsa në programin Infermieri nuk mund të regjistrohen më shumë së 109 studentë.
UP ka njoftuar se regjistrimi i kandidatëve si më sipër do të bëhet ditën e Hënë me datë 9.09.2019 nga ora 9:00 deri në ora 15:00, në Administratën Qendrore të UP-së (ndërtesa e Bibliotekës Qendrore Universitare).
Njoftimi i plotë i UP:
Njoftohen kandidatët të cilët në afatin e parë të konkursit nr. 1/893, dt. 4.7.2019, për pranimin e studentëve në vitin e parë të studimeve themelore-baçelor për vitin akademik 2019/20, kanë aplikuar për pranim në Fakultetin e Mjekësisë, programi i studimit “Mjekësi e Përgjithshme dhe programi i studimit “Infermieri”, e të cilët kanë kaluar pragun e kalueshmërisë, se mbi bazën e Vendimit nr. 304/01-B, datë 15.07.2019 si dhe Vendimit nr. 460/01B, datë 04.09.2019 të MASHT, për ndryshim të Vendimit nr. nr. 304/01-B, datë 15.07.2019, do të regjistrohen në drejtimet përkatëse sipas renditjes së pikëve të përgjithshme dhe atë si në vijim: Fakulteti i Mjekësisë: Në programin e studimit “Mjekësi e përgjithshme”, numrit aktual prej 150 studentëve të paraparë për pranim, i shtohen edhe 75 studentë të rinj nga listat e kandidatëve të papranuar (duke përfshirë kuotat e rezervuara), e të cilët kanë kaluar pragun e kalueshmërisë në bazë të renditjes së pikëve të përgjithshme nga lista e publikuar në ueb-faqen e Fakultetit të Mjekësisë. Numri i përgjithshëm i studentëve që do të pranohen në Fakultetin e Mjekësisë, programi-Mjekësi e përgjithshme nuk guxon të kaloj 225 studentë. Në programin e studimit “Infermieri”, numrit aktual prej 50 studentëve të paraparë për pranim i shtohen edhe 59 studentë të rinj (duke përfshirë kuotat e rezervuara).Meqenëse në Programin e studimit “Infermieri”, kanë mbetur të paplotësuara disa vende për arsye të mos kalimit të pragut të kalueshmërisë, vendeve të pa plotësuara i shtohen edhe 59 vende tjera, të cilat do shpërndahen në bazë të përqindjeve të parapara dhe do të publikohen në Konkursin plotësues. Numri i përgjithshëm i studentëve që do të pranohen në Fakultetin e Mjekësisë, programi-infermieri nuk guxon të kaloj 109 studentë.
Historiku i problemit
Ministri i Arsimit, Shkencës dhe Teknologjisë, Shyqiri Bytyqi para dy ditësh ka marrë një vendim të ri në lidhje me studentët e Fakultetit të Mjekësisë në Universitetin “Hasan Prishtina”.
Bytyqi ka obliguar UP-në që të rrisë numrin e studentëve sipas vendimit që ai e kishte marrë më 15 korrik të këtij viti, kështu duke e injoruar vendimin e Këshillit Shtetëror të Cilësisë rreth kësaj çështjeje.
“Obligohet Universiteti i Prishtinës “Hasan Prishtina” gjegjësisht Fakulteti i Mjekësisë, që të regjistrojë studentët e cekur në vendimin me nr.304/-B”, thuhet në vendimin e tij të siguruar nga KALLXO.com.
Para dy ditësh ministri në detyrë i Arsimit, Shyqiri Bytyqi ishte takuar edhe me disa nga anëtarët e KShC-së.
Mosrritja e numrit të studentëve të Fakultetit të Mjekësisë kishte shkaktuar edhe protesta nga ana e studentëve, ku edhe kishin paralajmëruar grevë urie.
Këshilli Shtetëror i Cilësisë në mbledhjen e 26 korrikut e kishte rrëzuar vendimin e Bytyqit, duke vendosur që të mos rritet numri i studentëve të këtij Fakulteti. Për këtë pikë kishin votuar katër anëtarë për dhe tre kundër, ndërsa prezentë ishin shtatë anëtarët nga nëntë gjithsej.
KShC është organ që vendos për rritje të numrit të studenteve në bazë të rekomandimeve të ekspertëve ndërkombëtarë.
