U pa në tubim, por a e mbështet ish-ambasadori William Walker Koalicionin për Familjen?

Në ditën kur Koalicioni për Familjen hapi fushatën zgjedhore me një tubim, mes shumë e shumë përkrahësish aty u pa edhe ish-shefi i Misionit Verifikues të OSBE-së në Kosovë, William Walker.

I pyetur se a do të thotë pjesëmarrja e tij mbështetje për Koalicionin për Familjen gjatë zgjedhjeve që do të mbahen më 09.02.2025, Walker tha edhe para 15 viteve pati marrë pjesë në tubimin e Lëvizjes Vetëvendosje.

“Së pari, nuk kam mbështetur partinë e Behgjet Pacollit. Po i tregoj botës që, hej, 15 vite më parë mbështeta Vetëvendosjen”- tha Walker në një intervistë për KALLXO.com.

“Erdha këtu gjatë periudhës së zgjedhjeve, shkova në tubimet e tyre fillestare, kur sapo ishin bërë parti politike”- shtoi ai, duke treguar edhe arsyen se pse shkoi në tubimet e Vetëvendosjes para 15 viteve: “Sepse po kërkonin të arrinin pushtetin përmes votës, që sipas meje është thelbi i demokracisë”.

I pyetur se a është i kënaqur në përfundim të mandatit të Vetëvendosjes, William Walker tha se tash pas katër vitesh dëgjon kritika të forta për kryeministrin Albin Kurtin, “mirë, kjo është demokracia”.

“Nuk mendoj që njerëzit po e vlerësojnë realisht çfarë po ndodh këtu politikisht. Behgjet Pacolli më tha që atëherë unë shkoja në tubimet e Vetëvendosjes vetëm për të treguar që mbështesja këdo që përpiqej të bindte popullin që vizioni i tyre për të ardhmen e këtij vendi meritonte një votë. Thjesht doja të thosha: Shikoni, jam këtu për të parë tubimin, nuk u bashkova me Vetëvendosjen atëherë, nuk po bashkohem as me partinë për Familjen”- shtoi Walker.

Fushata pёr zgjedhjet parlamentare nё Kosovё ka filluar zyrtarisht mё 11.01.2025.

Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

Walker njihet për kontributin e tij në Kosovë në dokumentimin e Masakrës së Reçakut.

Tmerrin që pa me sytë e tij në tokën e Reçakut më 15.01.1999, Walker i ka vendosur në faqe libri që dokumenton një nga masakrat më të përgjakshme nga lufta e fundit në Kosovë të titulluar “Reçak: Historia e një krimi lufte”.

Ish-ambasadori Walker e kishte parë nga afër krimin e kryer mbi civilët shqiptarë dhe ka pasur rol kyç për dokumentimin e Masakrës së Reçakut.