U ankua se mungonin votat e familjarëve, PZAP urdhëron rinumërimin e votave

Kandidates së LDK-së për asambliste në komunën e Rahovecit, Hazbije Shala, i është pranuar si e bazuar ankesa nga Paneli Zgjedhor për Ankesa dhe Parashtresa, se në disa vendvotime nuk figurojnë votat e familjarëve të saj.

Kësisoj, PZAP ka urdhëruar Komisionin Qendror të Zgjedhjeve që të rinumërojë votat e kandidatëve të LDK-së për Kuvendin Komunal të Rahovecit në 15 vendvotime.

Kundër këtij vendimi është e lejuar ankesa në Gjykatën Supreme të Kosovës  brenda 24 orëve nga momenti i marrjes-pranimit të këtij vendimi.

Komuna e Rahovecit do të shkojë në balotazh më 14 nëntor.

Sipas rezultateve përfundimtare të KQZ-së për rundin e parë të zgjedhjeve që janë mbajtur më 17 tetor, kandidati i AAK-së Smajl Latifi i ka marrë 47,18 për qind të votave, kurse Visar Korenica nga LVV 24,84 për qind.

Vendimin e PZAP mund ta gjeni KËTU.