Gjykata Speciale për krime të luftës në Kosovë, Hagë
Tushi refuzon ftesën nga Gjykata Speciale
I ftuari i radhës nga Gjykata Speciale është Fatmir Brajshori, i njohur si Tushi.
Brajshori, përmes një postimi në Facebook, ka treguar për ftesën duke thënë poashtu se ka vendosur që të mos i përgjigjet kësaj ftese sepse, siç shkruan ai, “nuk e njohë Gjykatën Speciale të Hagës”.
“Unë e refuzoj ftesën ngaqë s’kam arsye përse t’i përgjigjem nëse gjatë viteve 1998-2000 s’kam jetuar në Kosovë dhe këtë ftesë dërguar personit tim, do të duhej shfrytëzuar organizatat e dala të luftës, që Gjykatën ta shpallë si inekzistente dhe Kuvendi i ri i Kosovës ta shfuqizojë vendimin që kishte marrë aso kohe, ai Kuvendi i turpit”, ka shkruar Brajshori.
Historiku i Gjykatës Speciale
Gjykata Speciale ishte miratuar më 3 gusht të vitit 2015 në Kuvendin e Kosovës, pas kërkesave të shumta nga ndërkombëtarët.
Në atë kohë, kryeministër kishte qenë Isa Mustafa, ndërsa zëvendëskryeministër Hashim Thaçi. Ky i fundit kishte qenë shumë i zëshëm në mbështetjen e krijimit të kësaj Gjykate. Gjykata Speciale për Kosovën në përbërjen e saj do të ketë vetëm prokurorë e gjykatës ndërkombëtarë.
Ajo ka filluar punën muajve të fundit, kur ka ftuar disa ish figura të larta të Ushtrisë Çlirimtare të Kosovës.
Lëvizja Vetëvendosje kishte qenë partia e vetme e cila unanimisht kishte votuar kundër krijimit të kësaj Gjykate, ndërsa nga partitë e tjera ka pasur disa figura të pakta që kanë votuar kundër.
