Tre persona kapen duke i kontrabanduar nëntë kuaj e një gomar nga Maqedonia e Veriut

Policia e Kosovës ka identifikuar disa persona të dyshuar duke i sjellë këmbë disa kuaj nga fshati Tanushë i Maqedonisë së Veriut përmes rrugëve ilegale.

Sipas njoftimit, dy personat dhe përcjellësi i tretë (të dyshuarit), janë ndaluar nga Policia duke i kontrabanduar nëntë kuaj dhe një gomar.

“Pas tentimit për t’iu shmangur patrullave policore kanë devijuar rrugën Mjak-Binqë duke vazhduar rrugëve malore që lidhen me fshatin Kabash-Viti, por është arrit të ndalohen nga Policia duke i kontrabanduar nëntë (9) kuaj dhe një (1) gomar”- thuhet në njoftim.

Policia ka njoftuar se lidhur me rastin është njoftuar prokurori kujdestar, Dogana e Kosovës dhe Agjencia e Ushqimit dhe Veterinës.

Ndërsa, me urdhër të prokurorit kafshët sekuestrohen dhe dërgohen në terminalin doganor për procedim të mëtejmë të rastit.