Foto: Urim Krasniqi/KALLXO.com

Tiranë: Qeveria publikoi planin kundër krizës energjitike pa ndërprerje dhe pa shtrenjtim të energjisë

Një ditë pasi shpalli emergjencën energjitike, qeveria shqiptare publikoi sot edhe planin për të mbrojtur familjet dhe bizneset e vogla nga kriza energjitike, e cila, sipas kryeministrit Rama, do të sjellë çmime të larta dhe situata të jashtëzakonshme.

Kryeministri Rama u shpreh se plani me 3 pika synon të mbrojë familjet dhe biznesin e vogël dhe nuk bazohet tek ngritja e çmimit të energjisë.

Ai tha se në tregjet ndërkombëtare ka një rritje marramendëse të çmimit të energjisë elektrike, ndaj qeverisë i duhet të ndërhyjë me masa financiare dhe administrative, ndërkohë që e ka të pamundur të furnizojë konsumatorët nga prodhimi vendas dhe i duhet të importojë energji.

“Plani ynë i kundërveprimit ka tre pika: 1. Garantimi i furnizimit të pandërprerë me energji elektrike për të gjithë. 2. Mbrojtja e familjeve dhe biznesin e vogël nga rritja e çmimit të energjisë elektrike. 3. Garantimi i fondit të nevojshëm likuid për ndërveprimin me tregun e energjisë elektrike, përfshi këtu garanci sovrane të shtetit dhe fonde 100 milionë euro për OSHEE-në në fund të këtij viti dhe 100 milionë në fillim të vitit tjetër” – tha zoti Rama.

Zoti Rama nuk dha detaje të hollësishme mbi planin e antikrizë, por shpjegoi më shumë parimet mbi të cilat ishte ngritur ai.

Qeveria vendosi të ngrejë një grup për administrimin e emergjencës, pezulloi investimet në tre kompanitë e sektorit energjitik të pezullojnë investimet, ndërsa ministria e Financave pritet të sigurojë mekanizmat për përballimin e importit të energjisë. Emergjenca energjitike pritet të vazhdojë deri në mesin e pranverës së ardhshme, tha zoti Rama, ndonëse nuk përjashtoi edhe ngjarjet e papritura, që mund të shkaktoni ndryshime të masave.

“Plani ynë i kundërveprimit nuk parashikon rritjen e çmimit të energjisë për konsumatorët familjarë dhe për biznesin e vogël, as parashikon ndonjë operacion kufizimesh të furnizimit me energji elektrike. Stuhia e kësaj krize parashikohet nga ekspertët ndërkombëtarë dhe disa qeveri mike të shtrihet deri në fillim të verës së ardhshme” – u shpreh zoti Rama.

Por Partia Demokratike e opozitës deklaroi se ajo që qeveria e quan krizë energjitke, sipas saj është krizë korrupsioni dhe keqmenaxhimi.

Drejtuesit e partisë më të madhe opozitare pohuan se përmes tenderave korruptivë energjia blihet 3-4 herë më shtrenjtë nga jashtë, pasi energjia e hidrocebtraleve vendase shitet gjatë verës me çmim të ulët.

Opozita theksoi se 2021 është ndër vitet më të mira të prodhimit të energjisë në vend, kur është prodhuar më shumë se sa konsumi mesatar, por kompanitë shtetërore blejnë energji në periudhën e shtrenjtimit të saj.

Shqipëria bie herë pas here pre e krizave energjitke për shkak të thatësirave apo tronditjeve në bursat ndërkombëtare.

Pjesa dërrmuese e nevojave të vendit për energji plotësoshen nga hidrocentralet e vendit, më të fuqishmit mes të cilëve janë ndërtuar mbi lumin Drin në veri të Shqipërisë. VOA