Thyhen zyrat e AGK-së për të dytën herë

Zyrat e Asociacionit të Gazetarëve të Kosovës janë thyer për të dytën herë

Sipas njoftimit të vetë AGK-së, nuk është vjedhur ndonjë gjë ndërsa hetimet kanë nisur nga njësitet e Policisë së Kosovës.

“Zyrat e Asociacionit të Gazetarëve të Kosovës janë thyer sërish nga persona të panjohur. Ndryshe nga hera e kaluar, më 06.12.2019 kur u vodhën pajisje me vlerë të organizatës, kësaj radhe në zyrë nuk mungon asgjë, megjithëse kryesit kanë kontrolluar dhe shpalosur dokumentet”, thuhet në njoftim.

“Për rastin është njoftuar menjëherë Policia e Kosovës ndërsa tek pas rreth 2 orëve, në vendin e ngjarjes ka arritur ekipi i Forenzikës për t’i bërë hetimet e nevojshme”, thuhet tutje në njoftim.

Organizata që mbron dhe promovon të drejtat e gazetarëve në Kosovë ka shprehur shqetësimin me rastet e fundit.

“AGK është jashtëzakonisht e shqetësuar me këtë situatë dhe i dënon ashpër këtë akte vandale. Organizata fton organet kompetente që t’i zbardhin të dyja rastet, ani pse për rastin e parë, as pas dy muajsh, nuk ka pranuar asnjë informatë nga hetuesit. AGK kërkon që përgjegjësit për këto incidente të dalin para drejtësisë”, thuhet në fund të njoftimit.

Më 6 dhjetor të vitit të kaluar ishin thyer dyert e zyrave të AGK-së. Atë kohë u raportua edhe për vjedhje brenda objektit të AGK-së.

Kryetarja e AGK-së jep detaje për vjedhjen