Thirrje për adresim të nevojave për strehim të 7 familjeve në Istog
Organizata nga Peja “Syri i Vizionit” ka njoftuar në lidhje me gjendjen e rëndë të banimit të shtatë familjeve, të cilat kanë gjetur strehim në godinën e ish-burgut në lokalitetin Gurrakoc të komunës së Istogut.
“Që nga periudha e pasluftës së vitit 1999, pesë familje të komunitetit egjiptian dhe dy familje shqiptare, në mungesë të shtëpive të veta si shkak i kushteve të rënda ekonomike dhe sociale në të cilat gjenden, janë munduar ta sigurojnë banimin në godinën e ish-burgut i cili gjendet në lokalitetin Gurrakoc të komunës së Istogut. Gjatë gjithë kësaj periudhe 20-vjeçare këto familje kanë banuar në këtë godinë, e cila qysh në vitin 1999 ishte në gjendje të mjerueshme dhe të papërshtatshme për të siguruar banim të rehatshëm”, bënë të ditur kjo organizatë.
Sipas tyre, kushtet e jetesës në këtë hapësirë janë shumë të ulëta dhe jashtë cdo niveli.
“Me gjithë përpjekjet e vazhdueshme dhe të pareshtura të këtyre shtatë familjeve, por edhe të organizatave joqeveritare, subjekteve të ndryshme si dhe nismave të qytetarëve, të drejtuara tek institucionet kompetente e veçanërisht tek institucionet komunale të Istogut, me qëllim të rindërtimit të shtëpive ose të paktën sigurimit të një banimi të përkohshëm që i plotëson kushtet e domosdoshme për një banim të dinjitetshëm për këto familje, kushtet e banimit të këtyre familjeve në ish-godinën e braktisur të burgut në Gurrakoc janë nën çdo nivel të dinjitetit njerëzor dhe shoqëror”, thuhet në njoftim.
OJQ Syri ka kërkuar nga instuticionet kompetente që të reagojnë dhe të sigurojnë kushte të banimit për këtë familje.
“Duke e pasur parasysh gjendjen e rëndë të përshkruar më lartë në të cilat jetojnë këto familje, e cila dëshmohet qartë edhe nga fotot e realizuara në ambientet ku jetojnë, OJQ Syri i Vizionit u bën thirrje institucioneve kompetente të komunës së Istogut, atyre të shërbimeve sociale si dhe ministrive përkatëse që kanë për mandat ndihmën dhe sigurimin e mirëqenies sociale për qytetarët në nevojë, që në mënyrë urgjente të ndërmarrin veprime konkrete, para së gjithash për zhvendosjen dhe akomodimin e përkohshëm në kushte të përshtatshme banimi të këtyre familjeve, dhe pastaj për sigurimin e banimit të përhershëm, përkatësisht të ndërtimit të shtëpive për këto familje në kushte të rënda ekonomike e sociale”, përfundon njoftimi.