Thaçi takon shefin e EULEX-it, bisedon për masat për tejkalimin e pandemisë

Presidenti i vendit Hashim Thaçi, sot ka takuar Shefin e Misionit të EULEX-it, Lars-Gunnar Wigemark, me të cilin ka biseduar për zhvillimet në Kosovë në rrethanat e pandemisë.

Sipas komunikatës së lëshuar nga presidenca, Thaçi ka shprehur mirënjohjen e tij për angazhimin e EULEX-it që t’i ndihmojë qytetarët e Kosovës dhe institucionet e rendit dhe ligjit në këto rrethana.

“Jemi falënderues për përkrahjen dhe mbështetjen që keni dhënë, si për qytetarët, ashtu edhe për institucionet e rendit dhe ligjit në këto rrethana të reja të paparashikuara”, citohet të ketë thënë presidenti.

Shefi i EULEX-it është shprehur se misioni që drejton ai ka mbajtur të plota kapacitetet e veta dhe është përqendruar në përkrahjen e qytetarëve të Kosovë për kthim në vend në rrethanat e pandemisë, por edhe duke ofruar përkrahje, në veçanti me pajisje, për sistemin e drejtësisë, përfshirë edhe institucionet korrektuese.

Po ashtu Presidenti Thaçi vlerësoi bashkëpunimin e të gjithëve në tejkalimin e pandemisë.

Aktualisht në Kosovë janë 895 raste të konfirmuara me COVID-19, nga ta janë shëruar 657 persona, ndërsa kanë vdekur 28 persona.